Әріптесін ұрды деген әншінің ісі екі айға созылды

10 ақпан 2026, 11:30

2 523

Белгілі заңгер Инга Иманбай “Нұр-Мұқасан” тобының жаңа мүшесі Ғалымжан Сүлейменді соққыға жыққан әнші Мұқасан Шахзадаевқа қатысты қылмыстық іс бойынша тергеу амалдары созылып кеткенін айтқа,- деп хабарлайды Оpennews.kz ақпарат агенттігі.

Әріптесінен жәбір көрген әнші Ғалымжан Сүлеймен тергеу жұмыстары екі айдан бері жүріп жатқанын, алайда ешқандай нәтиже көрсетпегенін жеткізген. Оның айтуынша, бұған Мұқасан Шахзадаевтың қатысы бар.

“Көмекші жігіт “Аға, шынымды айтсам, сізді өлтіріп қоя ма деп қорықтым. Талып, есін білмей жатқан кезіңізде үстіңізге шығып тоқпақтап ұрды. Полицейлерді сол үшін шақырдым” деді. Жігіттердің тілімен айтқанда басыма секірген деп те айтуға болады. Жәбір көрген мен болсам да полицейлер келгенде мені алып кетті. Ол кісінің таныс-тамырларын сол кезде қосқаны белгілі болып тұр”, – деді ол.

Ол сондай-ақ Мұқасан Шахзадаев болған оқиғаны бұрмалап жеткізіп жүргенін айтқан.

“Уақыт өте келе адам өлген жоқ, қолым да, бетім де жазылды ғой деген ой келді. Бірақ той-домалақтарда отырып мені жамандап, болған оқиғаны бұрмалап жеткізіп жүргенін естідім. Мына істе сол бойынша да шықса деп ойлаймын, өйткені ол кісі жалған әңгіме шығарып, оны сенімді айтып жүр. Тергеушінің өзі мені қайта-қайта шақырды. Бірақ екі ай болды ма әлі созылып жатыр”, – деді ол.

Ал заңгер Инга Иманбайдың сөзінше, Қылмыстық кодекстің 107-бабы “Денсаулыққа қасақана ауырлығы орташа зиян келтiру” бойынша қозғалған істер әдетте екі аптадан бір айға дейінгі мерзімге сотқа жолданады. Бұл іс баяу жүріп жатыр.

“Тергеу барысы созылып кетті. Шындығын айту керек, мен Мұқасан мырзаның тергеу органдарына ықпалы бар деп санаймын. Өйткені ол кісі тергеуге келген кезде де өзін кінәлі сезінгенін немесе өкінгенін көрген жоқпын”, – деді Инга Иманбай.