ҚЫЗЫЛОРДАЛЫҚ АНА: МЕКТЕПТЕГІ ТАМАҚҚА КӨҢІЛ ТОЛМАЙДЫ

31 қаңтар 2024, 14:59

5 314

ФОТО: Ашық дерек көзі Соңғы уақытта Қызылорда қаласында мектептерде берілетін тамақтың сапасына байланысты сын айтушылар қатары көбейді, - деп хабарлайды «Opennews.kz» ақпарат агенттігі.

Мемлекет көпбалалы немесе күнкөрісі төмен отбасыдан шыққан оқушылар мен бастауыш сынып балаларын тегін түскі аспен қамтиды.

Жасыратыны жоқ. Әлеуметтік тұрғыда аз қамтылған отбасыларын айтпағанда, баласының жағдайын жасап отырған ата-ананың өзі де күні бойы жұмыста. Яки болмаса таңертең толық оянбаған, тәбеті ашылмаған баласын сабаққа кешігеді деп безектеп, тиісінше тамақтандырып үлгере алмайды. Көп әке-шешенің баласының мектепте не ішіп, не жеп жүргенін бақылап отыруға қажыры мен уақыты жетпейді.

Сонымен бүгінгі күні қызылордалық оқушыларға берілетін астың сапасы қандай?

Бүгінде бастауыш сынып оқушыларына берілетін ыстық тамақ «белгіленген нормаға сай емес» дейді ата-аналар. Ал білім басқармасы бұл пікірмен келіспейді.

Жас ана Жанардың төрт баласы бастауыш сынып оқушылары. Оның айтуынша, мектептің «білімі жақсы, дегенмен асханасындағы түскі тегін асы мүлдем нашар».

«Шын түстен кейін оқитын қыздарым айтып келеді, мұздай жуынды сияқты қалдық береді деп. Стақандар жуылмай бірінің үстіне бірі құяды сасық деп. Тіпті шаш пен шемішке қабығы шыққан кездер де бар» ,- деп жазды Жанар Жолдасқызы.

«Менің қызым ұшынып қалды. Кешегі ашыған күрішті берген», -деді Лаура Естаева

«Менің қызым №261 мектепте оқиды. Тамаққа ақша сұрайды. Тегін тамақ ішесің ғой десем, тамақ дәмсіз жегім келмейді дейді», - деп пікір қалдырған Айгерім.

«№7 мектепке тексеріс керек!», - дейді Айнұр.

«№140 мектеп тамақтары дәл осындай күйде. Асхананы жалға алған адамды ауыстырсын деп неше рет шағым келтірдік естімейді. Адам жеуге жарамайды. Сатып алынған бәліш пен пиццасының өзі резеңкедей», - дейді Ақмарал Бөлебай

Жасыратыны жоқ «әділетсіз өтетін тендерлер» ас мәзірінің сапасына теріс әсер етеді. Мамандардың сөзінше, мектептерді ыстық аспен қамтамасыз ету бойынша өтетін тендерлерде қызмет бағасын арзандатып, бір баланы белгіленген 300 теңге емес, 200, 180, тіпті кейде 160 теңгеге тамақтандырамыз дейтін кәсіпкерлер жеңіп шығып жататын көрінеді.

Тиісінше байырғы асхананың қызметкері де шындықты жайып салған:

«Бүкіл мектеп сондай. Мен өзім бұрын мектепте істегенмін асханада. Грамынан жейді тамақты таза фарштан жасамайды. Қатыққа су қосып береді. Қалған қатықты поварлар бөліп алып кетеді. Таза сары майдың орнына маргарин береді. Айта берсең былық көп. Ішпеген қатықтарды, жартылай ішілгенінде бірін-біріне құйып, келесі балаға беріледі.
Шағым жасағаннан ештеңе шықпайды бәрібір. Тексеріс келетін болса білім бөлімінен звондап, ескертіп қояды. Қашан баратынын, қай мектепте жүргендерін. Сосын бәрін ақша шешеді... Тендерден ұту үшін де ақша. .... »,- деп пікір қалдырды Айнұр.

Бұл жөнінде Қызылорда қалалық Білім бөлімі:

«Аталған мәселе назарға алынды. Тиісті жұмыстар жүргізілетін болады.»,- деп қысқа қайырған.

Ал оқу жылында аталмыш мәселе шешімін тауып жатса қанекей? Жыл сайына қайта көтерілетін мәселе сала басшыларының назарына ілікпей ата-аналардың ғана «басқатырмасына» айналғалы қашан...