Депутат нан бағасын 500 теңгеге көтеруді ұсынды
1 559
Жамбыл облыстық мәслихатының депутаты Мейрамбек Дөненбаев ауылшаруашылығы өнімдерінің бағасын өсіруді ұсынды. Оның сөзінше, нан 500 теңге болуы керек, - деп хабарлайды "Opennews.kz" ақпарат агенттігі.
Депутат қазір нан тым арзан дейді. Оның айтуынша, ауылшаруашылығы тауарын өндірушілерді қолдаудың басты тетігі – бағаның өсуі болуы тиіс.
“Шынымды айтсам, нан өте арзан. Нанның құны 500 теңгеден кем болмауы тиіс. Мен өзім ауылшаруашылық тауарын өндірушімін. Менің бидайым қазір 100 теңгеден де өтпей жатыр, – деді Мейрамбек Дөненбаев.
Журналист депутатқа “мұны халықтың қалтасы көтереді деп ойлайсыз ба” деген сұрақ қойды.
“Көтереді, әбден көтереді. Қазір кез келген тойханада, кез келген қоқыста тек нан жатады. Өзім нанды 110-120 теңгеден алып жүрмін, сүтті 300-350 теңгеге аламын”, – деді ол.
Депуататтың пікірінше, сонда ғана ауылдың жағдайы жақсарады-мыс. Ал оның әріптестері бұл пікірге мүлдем келіспейді. Мәслихат депутаты Бақытжан Қалымбетовтің айтуынша, дотациялық облыстарда нан 120 теңге тұрады. Ал халық қалаулысы Жұмахан Еркебаев нанның 500 теңге болғанына қарсы.
