Қызылордада кен орнында биіктен құлап, сал болып қалған қызметкер өтемақы ала алмай жүр
Қызылорда қаласында кен орнында биіктен құлап, сал болып қалған жұмысшы компания басшыларынан өтемақы ала алмай жүр, - деп хабарлайды "Opennews.kz" ақпарат агенттігі.
Палуанбек Жақсылықов екі жылдан бері арбаға таңылып, еңбекке жарамсыз болып қалған. Енді бұған компанияның салғырттығын кінәлайды. Айтуынша, кәсіпорында техникалық қауіпсіздік мүлдем сақталмаған.
Мұнай компаниясына тиесілі кен орнында дәнекерлеуші болған Палуанбек Жақсылықов бір сәтте жұмысқа қабілетсіз болып қалды. Екі жыл бұрын жұмыста биіктен құлап, жұлынына зақым келген. Ауыр жарақаттан кейін азамат сал болып қалған. Бірақ осы сәтте компания басшылары қолдау көрсетпеген.
Өндірістік жарақаттан кейін оған компания басшылары бастапқыда миллион теңге беріп, бір жыл жалақы төлеп келген. Олар істі жылы жабу үшін осындай әрекетке барған. Бірақ өтемақы ретінде өмір бойы жалақы төлейміз деген уәделерінен кейін тайқып кетіпті. Сондықтан арбаға таңылған жан жауапты органдарға арыздануға мәжбүр.
Палуанбек Жақсылықовтың адвокаты заң бойынша жарақат алған жұмысшыға зейнет жасына жеткенше өтемақы төленуі тиіс деп отыр.
43 жастағы азаматтың кәмелетке толмаған 6 баласы бар. Отбасы қазір тек мемлекет беретін жәрдемақымен күнелтіп отыр.
