«Ардагерлерді ардақтайық» жобасы аясында әжелер ансамблінің 15 жылдығы аталып өтті

30 қазан 2024, 15:23

1 573

«АMANAT» партиясының «Ардагерлерді ардақтайық» жобасы аясында Сырдария ауданының Н.Ілиясов ауылындағы «Ақ әжелер» ансамблінің 15 жылдық мерейтойы аталып өтті, - деп хабарлайды "Opennews.kz" ақпарат агенттігі.

Тағылымы мол іс-шараға аудан әкімінің орынбасары Т.Нұртазаев, «АMANAT» партиясының аудандық филиалының Атқарушы хатшысы А.Ибрагимұлы, аудандық мәдениет және тілдерді дамыту бөлімінің басшысы А.Қалдыбаева, Н.Ілиясов ауылының әкімі С.Нұрмағанбетов және ардагерлер мен ауыл тұрғындары қатысты.

Іс-шарада «Ақ әжелер» ансамблінің тарихы мен жетістіктері туралы кітаптың тұсаукесер рәсімі өтті. Сондай-ақ әжелерге құрмет көрсетілді. Айта кету керек, кітаптың жарыққа шығуына Қазақстанның Еңбек Ері А.Ералиев пен аудандық мәслихаттың депутаты, «АMANAT» партиясы депутаттық фракциясының мүшесі Д.Ералиев қолдау көрсетті.

Атағы тек жақсы жағынан шыққан ырысты ауылдағы «Ақ әжелер» ансамблінің құрылып, үлкен сахнада өнер көрсетіп жүргеніне биыл 15 жыл толып отыр. Бұл айтулы белес өнерлі, белсенді әжелер үшін ғана емес, біз үшін де ортақ қуаныш, ортақ мерейтой. Сондықтан аудан әкімінің атынан «Ақ әжелер» ансамблінің мүшелерін, тыңдармандарын мерейлі мерейтоймен шын жүректен құттықтаймын. Ел-халыққа өнер көрсетіп, әуелете ән шырқап жүрген әжелерге шығармашылық сәттілік пен табыс және зор денсаулық тілеймін, – деді аудан әкімінің орынбасары Т.Нұртазаев.

Өз кезегінде «АMANAT» партиясының аудандық филиалының Атқарушы хатшысы А.Ибрагимұлы ауылдың өнерін өрістетіп, мәдениетін биіктетіп жүрген әжелердің атқарған жұмысы мен сіңірген еңбегі көпке үлгі-өнеге екенін айтып, «Ардагерлерді ардақтайық» жобасының түпкі мақсатына тоқталды.

«Ардагерлерді ардақтайық» жобасы аға буын өкілдеріне, зейнеткерлерге, еңбек пен тыл ардагерлеріне құрмет көрсетуге бағытталған. Партия әркез ардагерлерді ардақтау іс-шараларын тұрақты ұйымдастырып келеді. Ұлтымыздың біртуар перзенті, көрнекті қоғам қайраткері Шерхан Мұртаза «Өнердің дамуы – қоғамның дамуы» деген екен. Сол себепті өнер, мәдениет саласын дамыту біздің жұмысымыздың басым бағыты болып қала береді. Осы ретте құрылғанына 15 жыл болған «Ақ әжелер» ансамбліне сәттілік тілей отырып, әжелердің өнеріне құрметпен қарайтын, әндерін сүйсіне тыңдайтын, ауданның мәдениет саласын дамытуға қосқан үлестерін жоғары бағалайтын азамат ретінде тілектестігімді білдіремін, – деді партияның аудандық филиалының Атқарушы хатшысы А.Ибрагимұлы.

Іс-шарада әжелер ән шырқап, өнер көрсетті. Сондай-ақ ансамбль мүшелеріне құрмет көрсетіліп, сый-сияпаттар табысталды.«Ардагерлерді ардақтайық» жобасы аясында құрылған әжелер ансамблінің 15 жылдық мерейтойы кең көлемде аталып өтті. Ерекше шара ауданның мәдени өміріндегі ұлттық дәстүрлер мен өнерді дәріптейтін әжелер ансамблінің шығармашылығын атап өтуге бағытталды.