Шәкіртке – үлгі, әріптеске – сыйлы

Қазалы ауданының тумасы Гүлсім Қуандыққызы еңбек жолын Ы.Алтынсарин атындағы №421 орта мектепте бастауыш сынып мұғалімі болып бастаған, - деп хабарлайды "Opennews.kz" ақпарат агенттігі.

Қырық жылға жуық педагогикалық еңбек өтілінде көптеген жетістікке қол жеткізіп, әріптестеріне үлгі көрсетіп келетін жандар арамызда кездесері хақ. Екі жылдық тәжірибеден соң С.Сейфуллин атындағы №165 орта мектебіне орналасты. Бүгінде осында бастауыш сынып мұғалімі қызметін мұнтаздай орындауда. Ұзақ жылғы тәжірибесін оңтайлы іске асыратын Гүлсім Қаратай талай мәрте түрлі байқауларға қатысып, өзі де шәкірттері де құрметке бөленген жан.

Қазір білім сапасын арттырудың талабы бойынша білім беру кеңістігіндегі инновациялық үдерістердің бағыттарының бірі – оқытудың жаңаша үлгілерін тиімді пайдалану. Мұғалімнің негізгі қызметі – оқыту, тәрбиелеу, дамыту. Бір сөзбен айтқанда, педгогикалық үдерісті басқару. Мұғалімнің алдындағы басты мұраты – өз пәнінен білім беріп қана қоймай, әр баланың «менін» ашу, сол «менді» шығармашылық тұлғаға жетелеу. Сонымен бірге өмірге деген өзіндік көзқарастарын қалыптастыру. Педагог өз қызметін шығармашылық бағытта ұйымдастыру үшін, ең алдымен, өз қызметінің мәнін түсіне білуі шарт. Оқу – адамның психикалық дамуының формасы, элементі. Кез келген оқыту белгілі бір мөлшерде адамды дамытады. Даму ұғымы философиялық сөздікте: «...мөлшерлік өзгерістердің белгілі бір өлшем шегінен шығып, сапалық өзгерістерге айналуы» деп түсіндіріледі.

Ұстаз — ұлы тұлға деген сөз қазақ мәдениетінде ерекше маңызға ие. Ұстаз — білім мен тәрбие беретін, жастарды өмірге бағыттайтын, оларды рухани және адамгершілік тұрғысынан дамытатын адам. Ұстаздың қоғамдағы орны мен рөлі аса жоғары, себебі ол шәкіртінің болашақта жеткен жетістіктеріне тікелей ықпал етеді.

Қазақ халқының дәстүрінде ұстаздарды құрметтеу, оларға ерекше көңіл бөлу — жоғары бағаланатын қасиет. Көптеген қазақ ақындары мен ойшылдары ұстаздың рөлін дәріптеп, оны елдің мәдениеті мен білімінің алғышарты ретінде сипаттаған. Мысалы, Абай Құнанбаев ұстаздың адам өміріндегі маңызы туралы көп айтқан, ол:

«Ұстаздық еткен жалықпас, үйретуден балаға» деген сөздері арқылы ұстаздың білім беру жолындағы қажырлы еңбегін жоғары бағалаған.

Ұстаз — ұлы тұлға деген сөздер тек кәсіби маман ғана емес, шәкіртінің өміріне терең әсер етіп, оның болашағын қалыптастырушы, қоғамның дамуына ықпал етуші тұлға екендігін білдіреді.

«Балаға білім бергенде, алыстан жақынға, таныстан жатқа көшіп, жаңа білімді ескі білімге байлап беру керек» деп М.Жұмабаев айтқандай, оқыту үдерісіне жаңа көзқараспен қарау, жаңа өзгерістерді меңгеру – уақыт талабы.

Балаларды әлемнің көпбейнелі жақтарын шығармашылық таным негізінде көре білу қабілетін дамыту, соның негізінде интеллектуалды креативті ұрпақты тәрбиелеп оқыту, педагогикалық-психологиялық маңызды мәселелерінің бірі. Қоғамдағы болып жатқан өзгерістер қазіргі білім беру саласында қызмет ететіндерге үлкен жауапкершілік артып отыр. Бұл жауапкершілік, ең алдымен, бастауыш сынып мұғалімдеріне жүктелері сөзсіз. Табысты оқыта отырып, құзырлы мұғалім – алдындағы оқушының жандүниесін жақсы түсіне білуі керек.

«Мұғалімнің үш көмекшісі» – «бас», «қол», «жүрек» арқылы оқушылардың оқытуын жақсартуға болады. Оқытуды жақсарту үшін сапаға мән берілуі тиіс. Сапалы оқыту – мұғалімнің қолданатын сан ­алуан әдіс-тәсілі арасындағы байланыс. Яғни оқушылардың қоршаған орта жағдайы және оқыту, білім алу мүмкіндіктерінің бірлігі мен жиынтығы ретінде қарастырылады.

Материал:  Qazaly.kz   сайтынан