Сыр өңірінде жақсы жағдайдағы жолдың үлесі 92 пайыздан асты
Бұл туралы Орталық коммуникациялар қызметінің брифингінде Қызылорда облысының әкімі Нұрлыбек Нәлібаев мәлімдеді, - деп хабарлайды "Opennews.kz" ақпарат агенттігі.
Биыл Қызылорда облысында республикалық және облыстық бюджеттен бөлінген 44 млрд. 703 млн теңгеге 300 шақырым автомобиль жолы жөндеуден өтті. Облыс орталығының негізгі көшелері әуежайдан Бейбарыс сұлтан көшесіне дейінгі аралық, қалаға Шиеліден кіреберіс жол, Яссауи, Жаппасбай батыр магистралды көшелері, Тәуелсіздіктің 25 жылдығы даңғылы төрт жолақты болып кеңейтілді.
Қызылорда қаласында 4 млрд. 700 млн. теңгеге Жанқожа батыр көшесі арқылы өтетін теміржол асты автожолы, Арал, Жаңақорған аудандарында теміржол үстінен аспалы көпір құрылыстары жүруде.
Айта кетейік, жылдар бойы күн тәртібінен түспеген «Қызылорда-Жезқазған» автожолы Президенттің тікелей тапсырмасымен қайта жаңғыртылуда. Жоба құны – 108 млрд. 500 млн теңге. Қызылорда облысының аумағына тиесілі 216 шақырым жолдың 140 шақырымы аяқталды. Қалған бөлігі 2026 жылы ел игілігіне беріледі.
Мұнан бөлек, көпшілікті толғандырған «Батыс Еуропа-Батыс Қытай» халықаралық дәлізінің Қызылорда қаласынан Ақтөбеге дейінгі аумағын төрт жолақтыға айналдыру мәселесі де Мемлекет басшысының тапсырмасымен шешімін табуда. Халықаралық дәліздің осы аумағын 1-санатқа ауыстыру бойынша «ҚазАвтоЖол» акционерлік қоғамы жоба-сметалық құжаттама әзірлеуде.
Биыл Қызылорда қаласының шет аймақтарындағы ұзындығы 43 шақырым болатын 46 көшені орташа жөндеуге 3 млрд. 217 млн. 300 мың.теңге бөлініп, жұмыс толық аяқталды.
Сонымен қатар, 29 шақырым болатын 16 көшеге жаяу жүргіншілер жолы салынды.
Қызылорда облысында жол инфрақұрылымын жақсарту жұмыстары нәтижесінде жақсы жағдайдағы жолдардың үлесі 92 пайыздан асты. Бұл өңірдің көлік желісін дамыту және тұрғындардың көлікпен қатынауын жеңілдету мақсатында жүзеге асырылған ауқымды жобалардың нәтижесі. Қала мен аудан орталықтары арасындағы қатынас, ауылдық елді мекендерге дейінгі жолдар айтарлықтай жақсарып, халықтың өмір сүру сапасын арттыруға ықпал етті. Қызылорда облысындағы республикалық және жергілікті жолдар жүйесі толықтай жөнделіп, жаңа асфальтбетон жабыны төселді. Бұл әсіресе қала мен ауылдар арасындағы жолдарды жақсартуға, көлік қозғалысын қауіпсіз әрі ыңғайлы етуге мүмкіндік берді. Қала орталығында және аудан орталықтарында да жолдар жаңартылып, көлік қозғалысының қарқынына сәйкес жасалған жолдар айтарлықтай жақсарды. Бұл, әсіресе, қоғамдық көліктердің жұмысына және жүк тасымалының тиімділігіне оң әсерін тигізеді.
Жолдардың сапасының артуы — тұрғындардың өмір сүру сапасын жақсартуға бағытталған үлкен қадам. Бұл инфрақұрылымдық жаңартулар аймақтағы экономикалық даму мен тұрғындардың жайлы өмір сүруіне үлес қосып, облыс аумағында көлікпен қатынау жүйесін айтарлықтай жеңілдетті. Жолдар мен көлік инфрақұрылымының жақсаруы аймақтың әлеуметтік және экономикалық дамуына оң ықпал етуде.