ШИЕЛІДЕ АҚ ХАЛАТТЫ АБЗАЛ ЖАНДАРҒА ҚҰРМЕТ КӨРСЕТІЛДІ

Медицина қызметкерлерінің кәсіби мерекесіне орай Шиелі аудандық мәдениет үйінде салтанатты шара өтті, - деп хабарлайды "Opennews.kz" ақпарат агенттігі. 

Денсаулық сақтау саласының қызметкерлеріне арналған мерекелік жиында ақ халатты абзал жандардың еңбегі еленіп, марапаттар табысталды.

Шара барысында аудан әкімі Айтбай Жандарбеков пен Қызылорда облыстық денсаулық сақтау басқармасының басшысы Олжас Ысқақов сала үздіктеріне алғыс білдіріп, жылы лебізін жеткізді. Мерекелік шарада "AMANAT" партиясы Шиелі аудандық филиалы төрағасының Алғыс хатымен бірқатар дәрігерлер марапатталды.

"Медицина – асқан жауапкершілікті, кәсіби шеберлікті және жанқиярлықты талап ететін сала. Ел Президенті Қасым-Жомарт Тоқаевтың тапсырмасына сәйкес, дәрігерлердің еңбегін бағалау – біздің басты міндетіміз," – деді аудан басшысы.

Шара соңында өнерпаздар тарапынан мерекелік концерт ұсынылып, кешке келгендерге көтеріңкі көңіл-күй сыйлады.