Қаз
Рус
Сауда министрі жаңажылдық дастарханға қанша теңге жұмсайтынын айтты
1 557
Сауда және интеграция министрі Арман Шаққалиев Жаңа жылдық дастарханның басты тағамы оның отбасында асылған ет екенін айтты. Оның айтуынша, мерекелік кешкі асқа жұмсалатын шығын шамамен 100-120 мың теңгені құрайды, - деп хабарлайды "Opennews.kz" ақпарат агенттігі.
"Басты тағам асылған ет болады. Ақшаны әйелім жұмсайды. Шектеулер әрдайым болады. Мен Сауда министрі ретінде базарға жиі барып, саудаласамын. Бұл қалыпты жағдай", - деді Шаққалиев Мәжіліс кулуарында.
Журналистер министрден сатушылар оған жеңілдік жасай ма деп сұрады.
"Әрине. Аздап жеңілдіктер бар, азы 5 мың теңгеден, үлкендері 10 мың теңгеден. Барлығы тауар сапасына байланысты, таңдаулысы қымбатырақ болады. Бірақ тұрақты клиент ретінде жеңілдік жасайды, кей жерде соманы дөңгелектеп, азайтып береді", - деді ол.
Министрдің айтуынша, ведомство есептеуі бойынша қазақстандықтардың Жаңа жылдық дастарханға жұмсайтын орташа шығыны 73 мың теңге шамасында. Алайда Шаққалиевтің отбасында шығын жоғары болмақ.
"Біздің отбасымыз үлкен, сондықтан шығын да көбірек болады деп ойлаймын. Шамамен 100-120 мың теңге. Осы бюджетке сүйенеміз", – деп түйіндеді Сауда министрі.
