−20°C-та қаңғыбас итке көмектескен курьерді "Додо Пицца" жұмыстан қуып жіберген

24 ақпан 2026, 11:30

1 511

Ресейдің Челябі қаласындағы пиццериялардың бірінде болған оқиға интернет қолданушыларының пікірін екіге бөлген,- деп хабарлайды Оpennews.kz ақпарат агенттігі.

Курьер Михаил мейрамхана кіреберісінде тоңып тұрған қаңғыбас итті көріп, оны жамылғымен жауып қойған. Алайда көп ұзамай ол осы әрекеті үшін жұмысынан айырылған.

Жағдай тез арада көпшілікке жария болып, әлеуметтік желіде наразылық толқынын туғызған. Даудың ортасында қызметкер мен жергілікті басшылық қана емес, сондай-ақ қызметкерлер мен клиенттер еркелетіп "Додобоня" деп атап кеткен ит те болған. Компанияның негізін қалаушы да бұл мәселені шешуге араласқан.

Жаңа басшылық қызметкерлерге қаңғыбас итке көмектесуге қатаң тыйым салғанын айтып, ескерту жасаған.

"Келесі рет иттің үстін жапқан адам соның соңынан өзі де кетеді. Соңғы рет ескертіп отырмын. Көмектескіңіз келсе, үйіңізге алып кетіңіз!" – деді басқарушы.

Желі негізін қалаушы Федор Овчинников челябілік иттің тағдырына жеке жауапкершілік алатынын айтқана. Ол Telegram-арнасында иттің жағдайы жақсы болатынын уәде етіп, панадан кейінгі өміріне де көмектесетінін жеткізген. Сондай-ақ ол жұртшылықты асығыс қорытынды жасамауға және пиццерия басқарушысын айыптамауға шақырып, оның жұмысының күрделі екенін атап өткен. Овчинников компанияның жануарлар паналарына тұрақты түрде көмектесетінін де еске салады.

"Біздің компания және мен жеке өзім Челябідегі Додобоня атты қаңғысбас иттің тағдырына енді жауаптымыз. Енді оның келесі тағдыры жақсы болады. Оның алдағы өмірі қалай қалыптасатыны туралы міндетті түрде бөлісемін", – деді негізін қалаушы.

Кейін курьердің жұмыстан босатылғаны туралы жаңалық әлеуметтік желіде тез тарап, қызу пікірталас тудырған. Көптеген келуші Михаилға қолдау білдіріп, наразылық ретінде желі мейрамханаларына бойкот жариялай бастаған.

"Қаңғыбас итке көмектескен жігіт ол пиццерияда бар болғаны 5 күн ғана жұмыс істепті. Ал басшылық оны "жүйелі түрде кешігіп жүргені үшін жұмыстан босаттық" деп жұртты сендіруге тырысқан. Егер ол небәрі 5 күн жұмыс істесе, қандай жүйелі кешігулер болуы мүмкін? Жоқ, бұл мүлде дұрыс емес. Барлық қала мен елдердегі филиалдарына толық бойкот жариялау керек деп есептеймін. Сондай-ақ, Додоның басқа нүктелеріне кеңесім бүкіл франшизаның беделіне нұқсан келтірген басқарушы Юлия мен иесіне қарсы сотқа жүгінсін. Соның салдарынан басқа филиалдар да шығынға ұшырады", – деп ашуланды оқырмандар.

Қолданушылар шешімді қайта қарауды және жауапты басшыларды жазалауды талап етті, курьердің әрекетін тәртіп бұзу емес, адамгершілік деп санаған.