Қазақстанда жалға берілетін тұрғын үйге жаңа талаптар бекітілді
Қазақстанда жалға алынған баспананың 50%-ын мемлекет өтейтін бағдарлама ережелері өзгертілді,- деп хабарлайды Opennews.kz ақпарат агенттігі Stan.kz сайтына сілтеме жасап.
Жалға алу ақысын субсидиялау деген не? Бұл бағдарлама 2022 жылдан бері жұмыс істейді. Мемлекет қатысушының жалдау ақысының 50%-ын төлейді. Тұрғын үйдің ауданы мен жалдау ақысына шектеулер бар.
Табыс мөлшері 1 адамға шаққанда күнкөріс минимумынан аспауы тиіс. 2026 жылы 50 851 теңге. 5 адамнан тұратын отбасы үшін шекті табыс - айына 254,2 мың теңге. Жыл сайын шамамен 10 мың отбасы осы көмекті алады. Бағдарламаның операторы - “Отбасы банк”. Үшжақты келісім жасалады: банк, жалға алушы және үй иесі арасында. Өтінішті кез келген уақытта otbasybank.kz арқылы беруге болады.
Субсидияны келесі санаттағы азаматтар ала алады:
- көпбалалы отбасылар;
- жетім балалар;
- I және II топтағы мүгедектігі бар адамдар;
- мүгедектігі бар бала тәрбиелеп отырған отбасылар.
Не өзгерді?
1. Барлығы цифрлық форматқа көшеді
Енді өтініш беру мен тексеру толық онлайн жүргізіледі:
- өтініштер онлайн тапсырылады;
- мәліметтер мемлекеттік базалар арқылы автоматты тексеріледі;
- барлық әрекет жүйеде тіркеледі.
2. Тексерулер тұрақты болады
Әкімдіктер әр тоқсан сайын тексеріс жүргізе алады:
- субсидия алушы сол мекенжайда шынымен тұра ма;
- бөтен адамдар жоқ па;
- пәтер заңсыз қайта жалға берілмеген бе?
3. Бұзушылықтарға қатаң мерзім енгізілді
Егер пәтерде бөгде адам тұрып жатса, 3 күн ішінде жағдайды түзету қажет.
Егер талап орындалмаса немесе қайта бұзылса:
- субсидия тоқтатылады;
- қайта қалпына келтіру мүмкін болмайды.
4. Туыстардан жалға алуға тыйым сақталады
Бұрынғыдай туыстардан (соның ішінде бұрынғы жұбайлардан) үй жалдауға болмайды.
Енді бұл талапты бұзғандарға жаза да күшейтілді:
- субсидия толық тоқтатылады;
- қайта алу мүмкіндігі берілмейді.
Бұл өзгерістер 12-ші шілдеден бастап күшіне енеді.
