Жұмыскер жұмыстан босатқан басшысынан кек алмақ

Атырау қаласында  жұмыстан босатқан басшысынан кек алмақ  болған мұғалім айыппұл арқалады - деп хабарлайды "Opennews.kz"  ақпарат агенттігі  Polisia.kz сайтына сілтеме жасап.  

11 тамыз күні 54 жастағы Мақат ауданының тұрғыны Атырау облыстық еңбек инспекциясы мен Атырау облыстық дене шынықтыру және спорт басқармасына арызданып, бұрынғы басшысы істі болған азаматты жұмысқа қабылдағанын айтқан. Осылайша, ол азаматтың абыройы мен қадір-қасиетіне нұқсан келтіретін көрінеу жалған мәліметтер таратқан. Аудандық полиция қызметкерлері тексеру кезінде бұл ақпараттың шындыққа жанаспайтынын анықтады. Кейін әйелдің жұмыстан шығарылғаны үшін басшысынан кек алуға тырысқаны белгілі болды.

"Қазір аталған азаматшаға қатысты Әкімшілік құқықбұзушылық туралы кодекстің 73-3 бабының 1-бөлігіне сәйкес әкімшілік хаттама толтырылып, сот шешімімен 326 704 теңге айыппұл салынды", – деді Атырау облысы полиция департаментінің бастығы Қамза Үмбетқалиев.