Таразда пара алған шенеунік 7,5 жылға сотталды
345
Тараз қаласының №2 соты Тараз қаласы бойынша мемлекеттік кірістер басқармасының бөлім басшысы Ержан Шымырқұловты бірнеше рет пара алғаны үшін кінәлі деп танып, оған 7 жыл 6 ай мерзімге бас бостандығынан айыру жазасын кесті, деп хабарлайды Ulysmedia.kz.
Жамбыл облысындағы антикордың мәліметінше, Бағлан Абдухаликов пен Ақмарал Баймұханова тобымен пара бергені үшін кінәлі деп танылып, әрқайсысына 7 жыл мерзімге бас бостандығынан айыру жазасы тағайындалған. Ал Марат Байжанов пара бергені үшін кінәлі деп танылып, 2 жыл 6 ай мерзімге бас бостандығы шектелді.
«ҚР Тәуелсіздігінің отыз жылдығына байланысты рақымшылық жасау туралы» Заңның негізінде залал келтіруге әкеп соқпаған ауырлығы орташа қылмыс жасағаны үшін Марат Байжанов негізгі жазадан босатылды. Қылмыстылардың барлығы мемлекеттік қызметте лауазымдарды атқару құқығынан айырылды», - деп хабарлады ведомстводан.
Айта кетейік, өткен жылдың қараша және желтоқсан айларында Шымырқұлов Байжановтан және Абдухаликов пен Баймұхановадан салық төлеу жөніндегі салық міндеттемелерін орындамауға ықпал еткені үшін 90 000 теңге және 1 250 000 теңге көлемінде бірнеше рет пара алған. Соттың үкімі заңды күшіне енген жоқ.
