Қызылорда жағажайында 16 жасар бала суға кетті

Қызылорда қаласында жасөспірім бала суға кетті, - деп хабарлайды Opennews.kz ақпарат агенттігі.

Бүгін, 25 шілде сағат 16:24 шамасында  облыстық төтенше жағдайлар департаментіне Қызылорда қаласында орналасқан «Сыр Самалы» жағажайында 15-16 жасар ер баланың суға кеткені жөнінде хабар келіп түскен. Суға батып кеткен тоғызыншы сынып оқушысының денесін іздестірген жағажай әкімшлігі құтқарушылар көмегіне жүгінуге мәжбүр болған.

  Оқиға орнына барғанда суға батқан жасөспірімнің №257 мектептің тоғызыншы сынып оқушысы екені мәлім болды. Іздестіру шарасына 7 құтқарушы тартылып, қажетті техника мен қайық пайдаланылды. Сүңгуірлер мүрдені су астынан іздеді. 

«Сағат 16:48-де 2006 жылы туылған баланың денесі батқан жерінен су астынан табылды. Қазіргі таңда баланың мүрдесі ішкі істер бөлімінің қызметкерлеріне табысталды.
Қала аумағында суға кету бойынша 10 адам тіркеліп отыр. Оның ішінде 6-бала. Сондықтан қала тұрғындарының назарына суға шомылу маусымында барлық талаптарды сақтай отыра, балалардың өздерін жібермеуді және де бала өміріне мұқият болуды сұраймыз.», - деді Қызылорда қаласы  төтенше жағдайлар департаментінің басшысы Жасұлан Түйменов.

Алайда, жағажай әкімшілігі баланың суға кеткендігі жөнінде батып бара жатқан бала белгі бермегендігін алға тартуда. Сонымен қатар, бүгінде жағажайда суға кету бойынша алғашқы мәрте орын алып отыр дейді. Ал, суға шомылуға келген жасөспірімдер шомылу барысында өзара қалжыңдасып, суға батырып ойнауы мен бірін-бірі итеріп, лақтыру секілді жәйттар көбейіп бара жатқандығын атап өтті.

Ал, төтенше жағдайлар қызметіне оқыс жағдай туралы жағажай әкімдігі хабарлаған.