Алматыдағы ауруханалардың бірінде бөлім меңгерушісі санитарды соққыға жыққан
431
Алматыдағы №7 қалалық клиникалық ауруханасында бөлім меңгерушісі 19 жастағы санитарды соққыға жыққан. Әріптестерінің сөзінше, жігіттің басы көгеріп қалған, деп хабарлайды Opennews.kz ақпарат агенттігі.
"Қатты ұрды. Қабылдау бөлімінде соққыға жықты. Санитар қорғанбады да, себебі меңгерушіден қорықты", – деді аурухана қызметкері.
Желідегі ақпаратқа сәйкес соққыға жығылған жігіттің есімі – Нұржан Оханов. Ол сараптамадан өткен, қазір денсаулығына байланысты демалыста. Ал ата-анасы полицияға арыз түсіріпті.
Кей мәліметтерде бөлім меңгерушісінің 19 жастағы жігітті бұған дейін де ұрғаны айтылған. Алайда істі жауып тастаған көрінеді. Сонымен қатар өзге де қызметкерлерге қол көтерген кездері болған. Оқиға туралы айтқан аурухана қызметкерлері аты-жөндерін атамауды өтінген.
"Психологиялық қысым көрсетіп, айқайлайды. Ойына келгенді жасайды. Науқастармен жұмыс істейміз, оңай емес. Ең лас жұмысты істейтін санитарлар соққыға жығылады. Сонымен қатар өзге ауруханаларда сыйлықақы берілсе, біз сырт қаламыз. Өткен мейрамдарда бір сыйлықақы алған жоқпыз", – деп мәлімдеген қызметкерлердің бірі Talgarnewskz басылымына.
Stan.kz тілшісіне жауап берген аурухананың баспасөз қызметі істің мән-жайын анықтау үшін қызметкерлермен, соның ішінде бөлім меңгерушісі және санитармен әңгімелесу жүргізілгенін хабарлады.
"Ішкі тексеріс қызметі бір тәулік бойы жұмыс процесін және қабылдау бөліміндегі микроклиматты бақылайды. 22 тамызда қабылдау бөлімінің барлық қызметкерлерінің қатысуымен кадр кеңесін өткізу жоспарланған. Мән-жайы анықталған соң тиісті шара қабылданады", – делінген хабарламада.
