Ақтөбе қаласында екі баласының қол-аяғы сынған ана мүгедек балаларға арналған оңалту орталығына шағымданды

Ақтөбелік келіншек мүгедек балаларға арналған жекеменшік оңалту орталығына екі баласын емдеуге әкелген. Кейін егіз ұлының осы орталықта қол-аяғы сынғанын білген, деп хабарлайды Opennews.kz ақпарат агенттігі “КТК” арнасына сілтеме жасап.

Гүлбану Жамбозова орталық мамандары балаларға уақытында алғашқы көмек көрсетпегеніне ашуланып, полицияға арыз түсірді. Ал емдеу орталығы ерекше күтім қажет ететін балаларға бас-көз бола алмағаны үшін 50 мың теңге өтемақы беруге даяр екенін білдірді.

Психикалық дамуы тежелген егіз ұлын Гүлбану Жамбозова жекеменшік оңалту орталығына емдетуге әкеліпті. 88 мың теңге ақшасын төлеп, балаларының денсаулығы түзелер деген үмітте болған. "Бәрі керсінше болды", – деп күрсінеді әйел. Осындағы әткеншектен құлаған бір ұлының башпайы, екіншісінің қолы сынған. Балаларының жарақат алғанын тек кешкілік үйіне алып кетер кезде ғана біледі. Оңалту орталығындағылар ата-анасына ескертпегені былай тұрсын, жедел жәрдем де шақырмады деп отыр.

“Осы орталықтан екі рет құлап, жарақат алды. Біреуі башпайын сындырды. Біреуі қолын сындырды. Маған: "Бала әткеншектен құлап қалып, байқаусызда сындырып алды" деді. Неге маған айтпады? Неге алғашқы көмек көрсетілмеді? Ауруханаға неге апармады? Тым құрығанда жедел жәрдем шақыруға болады ғой. Мен кешке біліп тұрмын”, – дейді Ақтөбе қаласының тұрғыны Гүлбану Жамбозова.

Оңалту орталығының басшылары сол күні-ақ балалардың анасынан кешірім сұрап, алдынан өттік деп ақталады. Қол-аяғы сынған егіз ұл үшін небәрі елу мың теңге моральдық шығын өтеуге дайын. Бірақ мұнымен келіншек келіспейді.

“Моральдық шығын ретінде елу мың теңге беруге дайынбыз. Қалған шығынын есептеп, балаға қажет көмекті көрсетуден қашпаймыз. Жұбайым осы жағдай үшін кешірім сұрап барды. Өзімнің де 17 жастағы аутизм балам бар. Науқас балалар қанша жерден қадағалап, бақылап отырсаң да, жарақат алады”, – дейді оңалту орталығының басшысы Руслан Қозыбаев.

Жергілікті денсаулық сақтау басқармасындағылар жекеменшік оңалту орталықтарына қандайда бір шара қолдануға құқымыз жоқ дейді. Тек ескерту айтып, кеңес берумен ғана шектеледі.

“Бұл орталыққа хат жазамыз. Оның басшысымен келісеміз. Арнайы бақылау жасайтын департамент бар. Департаментке хат жазамыз”, – дейді Ақтөбе облысы денсаулық сақтау басқармасы басшысының орынбасары Бақытжан Түлкібаева.

Қол-аяғы сынған егіз ұлдың анасы тәртіп сақшыларына арызданған. Олар қылмыстық іс қозғап, тексеру жүргізбекші.