Ғани Сүлейменов қарттарды Халықаралық қарттар күнімен құттықтады

1 қазан 2025, 15:48

2 238

1 қазан – Халықаралық қарттар күніне орай аудан әкімінің міндетін атқарушы Ғани Сүлейменов пен аудандық ардагерлер кеңесінің төрағасы Садық Әлиев бірқатар ардагерлердің үйлеріне арнайы барып, мерекелік құттықтау мен облыс және аудан әкімінің жылы лебізін жеткізді, - деп хабарлайды "Opennews.kz" ақпарат агенттігі.

Құрмет көрсету барысында ардагерлерге гүл шоқтары мен сый-сияпат табысталды. Ғани Сүлейменов ақсақалдарға ізет білдіре отырып, олардың ел үшін сіңірген еңбегін ерекше атап өтті.

– Ардагерлеріміздің жүріп өткен ғұмыр жолы – елдік пен ерліктің айнасы. Әділдікті ту етіп, ақиқат пен адалдықты ардақтаған сіздердің өнегелі өмір жолдарыңыз – жас ұрпақ үшін үлкен тәрбие мектебі. Сіздердің зор еңбектеріңіз ауданымыздың берік іргетасын қалауға сеп болды, – деді аудан әкімінің міндетін атқарушы.

Еңбек пен елдікке тағзым

Қариялар – қоғамның алтын діңгегі, елдік пен бірліктің тірегі. Осы мерекелік күні аудан басшылығы қазыналы қариялардың ел дамуындағы ерен еңбегін бағалап, алғыс білдірді.

Кездесу барысында ардагерлер де елдегі және өңірдегі оң өзгерістерге ризашылықтарын білдіріп, мемлекет тарапынан көрсетіліп жатқан қолдауларға алғыс айтты.

– Соңғы жылдары ауданымызда әлеуметтік-экономикалық даму байқалады. Жаңа нысандар салынып, жолдар жөнделуде. Бұл – ел бірлігінің, тұрақтылықтың, сондай-ақ басшылықтың жүйелі жұмысының жемісі. Қарияға құрмет – елге құрмет. Осындай мейірімді кездесулер көңілімізді көтеріп, қуаныш сыйлайды, – деді ардагерлердің бірі.

Ұрпақтар сабақтастығы – тұрақты дамудың негізі

Халықаралық қарттар күні – аға буын өкілдеріне құрмет көрсетіп, ұрпақтар сабақтастығын нығайтатын айтулы мереке. Бұл – тек бір күндік емес, күнделікті жасалуы тиіс ізгі дәстүрдің көрінісі.

Аудан басшылығы алдағы уақытта да қарттармен тұрақты байланыс орнатып, олардың өмір сапасын арттыруға бағытталған шараларды жалғастыра бермек.

Халықаралық қарттар күні 1990 жылдан бастап БҰҰ Бас Ассамблеясының шешімімен аталып өтіледі. Бұл күннің басты мақсаты – қоғамның аға буын өкілдеріне деген қамқорлығын арттырып, олардың тәжірибесі мен даналығына құрмет көрсету.