Ұлттық киім ұлттық рухты көтереді
Биыл Ұлыстың ұлы күні әз Наурызды тойлау аясында 18 наурыз «Ұлттық киім» күні болып белгіленген, - деп хабарлайды "Opennews.kz" ақпарат агенттігі.
Қазақтың ұлттық киімі – қазақ мәдениетінің маңызды және ажырамас атрибуты іспеттес. Қазақ халқының ұлттық болмысы өзіне тән оқшау қалыппен сақталып, өзге ұлттардан дараланып тұратындығымен ерекше.
«Ұлттық киімді тек қана Наурызда киеді» деген қасаң түсінік жоғалды
Қазіргі кезде ұлттық киімдер күнделікті тұрмыста да көп киілетінін байқап жүрміз. Елді мекендер мен қала көшелерінде ұлттық стильдегі шапан киіп жүргендер көбейді. Мұны өте жақсы үрдіс деуге болады. Атап айтқанда, ұлттық құндылықты насихаттау мен төл өнерді дамытуға атсалысып жүргендердің қарасы қалың.
Парламент Мәжілісінің депутаты Дәулет Мұқаев кейінгі жылдары ұлттық киімге деген сұраныстың арта бастағанын айтып отыр.
