Мұхтар Әуезов атындағы театрдың 100-ші маусымы ашылды

18 қараша 2025, 15:24

2 538

Мұхтар Әуезов атындағы Қазақ ұлттық драма театрының 100-ші маусымы салтанатты түрде ашылды,- деп хабарлайды Opennews.kz ақпарат агенттігі.

Ұлттық театр өзінің мерейтойына орай «Ғасырға басқан қадам» атты театрландырылған қойылымын ұсынды. Кеш барысында көрермендерге театр репертуарындағы таңдаулы спектакльдерден сахналық үзінділер көрсетілді. Сонымен қатар, қонақтарға «Ғасыр жасаған ұлт театры» атты интерактивті көрме ұсынылды.

Театрдың баспасөз қызметі мәлімдегендей, «бір ғасыр бойы сахнадан көрермен жүрегіне жол тапқан әр спектакль – халықтың үні, заманның тынысы. Қазақ театрының ғасырлық шежіресі – елдің өткені мен бүгіні, ұлттық рух пен көркем ойдың тұтас әлемі».

Еске салсақ, қазақтың тұңғыш кәсіби театры – Мұхтар Әуезов атындағы Қазақ ұлттық драма театры 1926 жылы 13 қаңтарда Қызылорда қаласында ашылған. Алғашқы қойылымдары Қ.Кемеңгерұлының «Алтын сақина» және М.Әуезовтің «Еңлік – Кебек» пьесаларының үзінділерінен тұрады.

1928 жылы театр Алматыға көшіп, жаңа буын актерлермен толықты. 1937 жылы академиялық театр мәртебесін алған, ал 1961 жылы жазушы Мұхтар Әуезовтің есімі берілді.