Жапон балет мектебінің оқушылары Қазақ ұлттық хореография академиясында шеберлік сабақтарын алды

 Қазақ ұлттық хореография академиясында Yoshiko Takagi Ballet School өкілдеріне арналған шеберлік сағаттары өтті. Мәдениет және ақпарат министрлігінің мәліметінше, делегация құрамында 23 оқушы мен 3 педагог болды. Олар Академия базасында жыл сайын ұйымдастырылатын күзгі мектеп бағдарламасына қатысты,-деп хабарлайды Opennews.kz ақпарат агенттігі.

Академия мамандары қонақтарға классикалық би және ұлттық-сахналық би бойынша арнайы сабақтар өткізіп, кәсіби тәжірибелерімен бөлісті. Сонымен қатар жапондық қатысушылар ел мәдениетімен, елорданың сәулетімен танысып, Астананың көрікті демалыс орындарын аралады.

Yoshiko Takagi Ballet School өкілдері Қазақстандағы балет мектебінің жоғары кәсіби деңгейін атап өтіп, Академияның халықаралық ынтымақтастыққа ашықтығын және хореография өнерін дамытуға қосып отырған үлесін бағалады.