Әскери-патриоттық әндер фестивалінің жеңімпаздары анықталды

Елордада Қазақстан Қарулы күштерінің Ұлттық әскери-патриоттық орталығында «Жас сарбаз» әскери-патриоттық әндер мен шығармашылық фестивалінің финалы өтіп, үздік жас орындаушылар мен өнер ұжымдары марапатталды,-деп хабарлайды Opennews.kz ақпарат агенттігі.

Биыл 28-рет ұйымдастырылған шара Кеңес Одағының Батыры Әлия Молдағұлованың 100 жылдығына арналды. Қорғаныс министрлігінің мәліметінше, байқауға еліміздің барлық өңірінен келген 27 команда қатысып, 100-ден астам жас өнерпаз өнер көрсетті.

Фестивальға «Жас сарбаз» қозғалысының тәрбиеленушілері, әскери-патриоттық клуб мүшелері, әскери колледж кадеттері және «Арыстан» мамандандырылған лицейінің оқушылары қатысты.

Байқау «Вокалдық орындаушылар», «Фольклорлық орындаушылар» және «Вокалды-аспаптық ансамбльдер» номинациялары бойынша өтті. 

Салтанатты марапаттау рәсімінде «Қарулы күштердің ардагерлері» республикалық қоғамдық бірлестігінің төраға орынбасары, генерал-майор Марат Нағұманов жас өнерпаздарды құттықтап, фестивальдің отаншылдықты нығайтудағы рөліне тоқталды.