Нұр-Сұлтанда «BYTEREKTE» инклюзивті шығармашылық көрмесі өтіп жатыр

Театр фестивалі аясында «Бәйтерек» монументінің астында «BYTEREKTE» инклюзивті шығармашылық көрмесі өтіп жатыр- деп хабарлайды Нұр-Сұлтан әкімдігінің ресми сайты.

Көрмеге кескіндеме, графика, инсталляция стилінде орындалған жас суретшілердің 40-қа жуық жұмыстары қойылған.

«BYTEREKTE» – Қазақстан Республикасы Тәуелсіздігінің 30 жылдығына арналған инклюзивті шығармашылық көрмесі. Бұл көрмеде 4-23 жас аралығындағы 40-қа жуық жас суретшілердің жұмысы ұсынылды. Онда кескіндеме, графика, инсталляция, керамика техникаларындағы жұмыстар қойылды», – деді Е15 ARTSPACE өнер мектебінің мұғалімі Гүлмарал Тәтібаева.

Сондай-ақ, фестиваль бағдарламасында актерлік мастер-класс, бейнелеу өнері көрмелері өтеді.