Мемлекет бюджеті жыл басынан бері 8 трлн теңгемен толықты
Үкімет отырысында Қаржы министрі Ерұлан Жамаубаев жыл басынан республикалық бюджет түсімі азайып, жергілікті бюджет кірістері артқандығын баяндады, - деп хабарлайды "Opennews.kz" ақпарат агенттігі.
«Мемлекет бюджетіне 8 трлн теңгеден аса кіріс түсті немесе жоспар 103,0% орындалды. Ал республикалық бюджетке 5,4 трлн теңге түсті. Жоспар 93,8% орындалды. Атқарылмаған бөлігі 355 млрд теңгені құрады», - деді Е. Жамаубаев.
Оған қоса, салықтар бойынша жоспардың 400 млрд теңгеге орындалмауына корпоративтік табыс салығы, шикі мұнайға экспорттық кеден бажы және пайдалы қазбаларды өндіруге салынатын салық әсер еткен.
«Корпоративтік табыс салығы бойынша жоспардың орындалмауы биылғы 5 айда 641 ірі салық төлеуші бойынша мәлімделген аванстық төлемдер сомасының өткен жылдың ұқсас кезеңінен 34% немесе 108 млрд теңгеге азаюымен байланысты. Шикі мұнайға экспорттық кеден бажы бойынша жоспардың орындалмауы нақты қалыптасқан мөлшерлемесінің болжамды көрсеткіштен 13% төмендеуімен байланысты болды. Пайдалы қазбаларды өндіруге салынатын салық бойынша жоспардың орындалмауына негізгі экспорттық тауарлар бағасының орта есеппен 11% төмендеуі әсер етті», - деп түсіндірді Қаржы министрі.
Министрдің айтуынша, жергілікті бюджеттердің кірістері 128,9% атқарылды және 2,6 трлн теңгені құрады. Мұндағы жоспар 590 млрд теңгеге, оның ішінде салықтар бойынша 548 млрд теңгеге асыра орындалды. Кірістер бойынша жоспарлар Алматы облысынан басқа барлық өңірлерде асыра орындалған.
