Қазақстан мұнай транзитін 1,5 млн тоннаға жеткізбек

6 наурыз 2024, 10:43

2 550

Қазақстанның Энергетика министрі Алмасадам Сәтқалиев сейсенбіде өзінің әріптесі-Әзербайжанның Энергетика министрі Парвиз Шахбазовпен кездесу өткізді, - деп хабарлайды "Opennews.kz" ақпарат агенттігі.

Кездесу Қазақстан мен Әзербайжан арасындағы сауда-экономикалық ынтымақтастық жөніндегі бірлескен үкіметаралық комиссияның 20-шы отырысының қорытындысы бойынша өтті.

Кездесу барысында тараптар елдердің энергетика, қазақстандық мұнай транзиті, жаңартылатын энергия көздерінің ауқымды жобаларын іске асыру саласындағы ынтымақтастығына қатысты бірқатар мәселелерді талқылады.

Өздеріңіз білетіндей, 2022 жылдың қараша айында «ҚазМұнайГаз» және SOCAR компаниялары арасында Ақтау-Баку-Тбилиси-Джейхан бағыты бойынша мұнай транзиті туралы келісімге қол қойылды.

2023 жылы Ақтау портынан жөнелтілген мұнай Баку-Тбилиси-Джейхан бағытында 1 057 мың тонна болды.

2024 жылға қазақстандық мұнайды БТД арқылы жылына 1,5 млн тонна көлемінде жеткізу жоспарланған.

«Біздің ұлттық компанияларымыздың алдына Қазақстанда өндірістің өсуін ескере отырып, мұнай жеткізу көлемін ұлғайту міндеті қойылды. Осыған байланысты біз қазақстандық мұнайды жеткізу көлемін ұлғайтуды жоспарлап отырмыз», — деп атап өтті кездесу барысында А.Сәтқалиев.

Энергетика министрлігінің басшылары Каспий теңізінің түбіне терең су кабелін төсеу арқылы Кавказ өңірі мен Орталық Азияның энергия жүйелерін қосуға бағытталған жобаны іске асыру бойынша алдағы жұмыстарды талқылады.