2024 жылы ел экономикасына ₸16 трлн инвестиция тартылды

5 қаңтар 2025, 15:49

2 657

Елде негізгі капиталға салынатын инвестиция көлемі баяулады, - деп хабарлайды "Opennews.kz" ақпарат агенттігі.

Былтыр 11 айда өсім 103%-ті көрсетті. Бұл 2023 жылғы көрсеткішпен салыстырғанда 8%-ке төмен. Сарапшылар бұл үрдісті елдегі ірі жобалардың аяқталуымен байланыстырады. Десе де, 2024 жылы ел экономикасына 16 трлн теңге инвестиция тартылды.

Әлжан Естемесов, «Kazakh Invest» ҰК» АҚ Жобалар департаменті директорының орынбасары: - Қазір бүкіл әлемде өңдеуді шикізатқа жақын жерде жасау трендке айналды. Сондықтан көптеген елдің компаниялары Қазақстанға қызығып тұр. Бізде тау-кен, мұнай саласындағы шикізат қана емес, ауыл шаруашылығының шикізаты көп. Атап өтсек, ауыл шаруашылығы саласында бидай өңдеу саласы қызық болып тұр. Қазақстанда жылына 15-20 млн тонна бидай орылады. Бірақ өзіміз пайдаланатыны 6-7 млн тонна. Қалғаны экспортқа кетеді.

Яғни, Қазақстан экономикасы әртараптандыру үрдісі жүріп жатыр. Шағын бизнестің де белсенділігі артқан. Бұрын ірі мұнай және металлургия компаниялары негізгі капиталға салынатын инвестициялардың 50%-тен астамын қамтамасыз ететін. Бірақ соңғы төрт жылда олардың үлесі 33%-ке дейін төмендеп келеді. Ал шағын бизнес рекордтық өсім көрсетіп, 2024 жылы елдегі инвестициялардың 58%-ін құрады. Соңғы 20 жылда ел экономикасына 416 млрд доллар шетелдік инвестиция салынған. Ең көп қаржы құйғандар қатарында Нидерланды, АҚШ, Швейцария және Қытай бар. Алдағы 5 жылда дәл осынша қаражат тарту жоспарда бар.