Теміржол логистикасы ел экономикасына жаңа мүмкіндік бермек

 Елдің географиялық орнын пайдалана отырып, Азия мен Еуропа арасындағы транзиттік әлеуетті арттыру басты мақсатқа айналды,- деп хабарлайды Opennews.kz ақпарат агенттігі Kaz.inform.kz  сайтына сілтеме жасап.           

Бұрын теміржол инфрақұрылымы негізінен шикізатты, оның ішінде мұнай, газ, металл және астық өнімдерін экспорттауға бағытталған болатын. Қазір бұл жүйе біртіндеп жаңа логистикалық модельге көшуде. Жаңа модельде басты рөлді контейнерлік және мультимодальды тасымалдар атқарады, бұл тек экономикалық тиімділікті арттырып қана қоймай, Қазақстанның транзиттік әлеуетін халықаралық деңгейде күшейтеді. Геосаяси факторлар, экологиялық талаптар мен инфрақұрылымды жаңарту шығындары сияқты сын-қатерлер де бар. Осы жағдайларды ескере отырып, мемлекет Еуразиядағы негізгі транзиттік тораптардың бірі бола ала ма деген сұрақ өзекті болып отыр. 

Тәуелсіздік жылдарында Қазақстан теміржол желісінің рөлі мен географиясын қайта қарастырды. Бұрын бұл инфрақұрылым негізінен шикізат пен ауыл шаруашылығы өнімдерін экспорттау үшін қолданылса, қазір ішкі қатынасты қамтамасыз ету және халықаралық транзитті дамыту үшін де пайдаланылуда. Соңғы 35 жыл ішінде елімізде 3 400 шақырым жаңа теміржол желісі салынды, олардың ішінде 1 000 шақырымы электрлендірілді. Бұл теміржол желісі жүк тасымалының жылдамдығын, қауіпсіздігін және экологиялық тиімділігін арттырд

Теміржол инфрақұрылымын дамыту екі бағытта жүргізілді:

- Халықаралық транзиттік дәліздер - бұл бағытта «Жетіген – Алтынкөл (Қорғас)», «Жезқазған – Бейнеу» және «Өзен – Болашақ» жобалары іске асырылды. Бұл дәліздер Азия мен Еуропаны байланыстыратын маңызды маршруттарды құрайды, сонымен қатар мультимодальды тасымалға мүмкіндік береді.

- Ішкі өңірлерді байланыстыру елдің ішкі экономикалық интеграциясын қамтамасыз ету мақсатында «Шар – Өскемен», «Ақсу – Дегелең», «Хромтау – Алтынсарин» және «Арқалық – Шұбаркөл» жобалары жүзеге асырылды. Бұл жаңа желілер өңірлер арасындағы тауар және жүк тасымалын жеңілдетіп, экономикалық даму үшін маңызды инфрақұрылым болып отыр.

Қазақстан теміржолы тек шикізат тасымалы үшін ғана емес, халықаралық транзиттік әлеуетін арттыруға бағытталған кешенді жүйеге айналды. Елдің географиялық артықшылығын пайдаланып, Азия мен Еуропа нарығын байланыстыратын жаңа логистикалық дәліздерді дамыту - экономикалық өсім мен халықаралық сауданы кеңейтудің маңызды факторы болып отыр.