12,6%-дық несие: Бизнесті қолдауға жаңа қаржы бөлінеді

Бүгін, 13:30

2 500

Halyk Bank пен "Даму" кәсіпкерлікті дамыту қоры Қазақстандағы шағын және орта бизнесті қолдау бағытындағы ынтымақтастығын жалғастыруда,- деп хабарлайды Оpennews.kz ақпарат агенттігі.

"Өрлеу" бағдарламасы аясында жеңілдетілген несие берудің жаңа кезеңіне 55,6 миллиард теңге бағытталады. Бұл қаражат инвестициялық жобаларды қаржыландыруға және бұған дейін берілген несиелерді қайта қаржыландыруға қолжетімді болады.

Бизнесті дамытуға тағы да қаражат бөлінеді

Жаңартылған келісім аясында әр қарыз алушы 12,6%-дан аспайтын жылдық мөлшерлемемен 7 миллиард теңгеге дейін несие ала алады. Несие мерзімі – 10 жылға дейін.

Негізгі артықшылық отандық өндірушілерге беріледі. Атап айтқанда, "Қазақстанда жасалған" белгісі бар жабдықтар мен техниканы сатып алуға басымдық болады. Банк мәліметінше, импорттық жабдықтарды қаржыландыруға отандық баламасы болмаған жағдайда ғана рұқсат етіледі.

Halyk банктің шағын және орта бизнесті несиелендіру департаментінің директоры Дияр Макулбаевтың пікірінше, қосымша қаржыландыру бизнесті белсенді қолдауды одан әрі жалғастыруға мүмкіндік береді.

"Шағын және орта бизнесті қолдау Halyk Bank үшін негізгі басымдықтардың бірі болып қала береді. Бағдарламаға деген жоғары сұраныс өткен жылғы нәтижелерден де көрінеді. Бағдарлама аясында банк жалпы сомасы шамамен 250 миллиард теңгеге жуық 700 жобаны қолдады. Қосымша қаржыландыру кәсіпкерлердің жеңілдетілген қаржы ресурстарына қолжетімділігін кеңейтіп, кәсіпорындарды жаңғыртуға және олардың бәсекеге қабілеттілігін арттыруға бағытталған инвестициялық жобалардың одан әрі іске асырылуына жол ашады", – деді Дияр Макулбаев бағдарламаның жаңартылған шарттарына қатысты пікір білдіріп.

Қаржыландыруды қандай мақсаттарға алуға болады?

Кәсіпкерлер қаржыны инвестициялық жобаларға, соның ішінде жабдықтар мен арнайы техника сатып алуға, нысандар салуға, қайта жаңғыртуға және жаңартуға, сондай-ақ бұған дейін берілген инвестициялық несиелерді қайта қаржыландыруға бағыттай алады.

Салаларға келетін болсақ, бағдарлама өсу әлеуеті жоғары әрі ел экономикасының дамуына елеулі үлес қосатын бағыттарға ерекше мән береді.

Halyk банктің ШОБ-қа арналған мемлекеттік бағдарламалар басқармасының басшысы Жанна Зейнелова мұндай тәсіл мемлекеттік қолдау шараларын барынша тиімді пайдалануға мүмкіндік береді деп есептейді.

"Әрбір инвестициялық жобаның артында бизнестің жаңа деңгейге көтерілу мүмкіндігі тұр. Бұл өндірісті кеңейтуге, заманауи технологияларды енгізуге, жаңа жұмыс орындарын ашуға және бизнестің тиімділігін арттыруға жол ашады. Сондықтан бүгінде өңдеу өнеркәсібі, туризм, ақпараттық технологиялар және креативті индустрия салаларындағы жобаларға ерекше көңіл бөлінеді. Қолжетімді әрі ұзақ мерзімді қаржыландыру кәсіпкерлерге осындай жобаларды жүзеге асыруға мүмкіндік беріп, отандық өндірістің дамуына және бизнестің бәсекеге қабілеттілігін арттыруға ықпал етеді", – деді Жанна Зейнелова.

Қаржы ұйымының мәліметінше, "Өрлеу" бағдарламасы өңдеу өнеркәсібі, туризм, ақпараттық технологиялар және креативті индустрия салаларында жобаларды жүзеге асыратын микро, шағын және орта кәсіпкерлік субъектілеріне бағытталған.

Экономиканың басым салаларында жобаларды іске асырып жатқан кәсіпкерлер бағдарламаға қатысу шарттары бойынша толық ақпарат алу үшін Halyk банкінің филиалдарына жүгіне алады.

ҚНРДА Банк операцияларын және өзге де операцияларды жүзеге асыруға арналған лицензия (Әмбебап банктік лицензия) №1.1.601.130 берілген күні 13.07.2026.

ҚНРДА Бағалы қағаздар нарығында қызметті жүзеге асыруға арналған лицензия №1.2.47/230/38/1 берілген күні 23.06.2023.