Қазақстандық оқушылар Түркияда робототехникадан чемпион атанды

16 қаңтар 2024, 11:23

2 526

Жарысқа 30-дан астам түрік және екі қазақстандық команда қатысты.Жаңаөзен мен Алматының оқушылары Түркияда робототехникадан чемпион атанды. Бұл туралы Оқу-ағарту министрлігі мәлім етті."14 қаңтар күні Қазақстан құрамасы Türkiye FIRST Tech Challenge робототехника бойынша жабық чемпионатта жеңіске жетті. Жарысқа 30-дан астам түрік командасы және екі қазақстандық Rebels және Queue командалары қатысты. Бұл Жаңаөзен және Алматы қалаларының Білім Инновация Лицейлерінің 9, 10 және 11 сынып оқушылары", - деп хабарлайды "Opennews.kz" ақпарат агенттігі.

Роботтар ойынында қазақстандық оқушылар жоғары төрешілік марапаттарға да ие болды.

Алматы қаласының Queue командасының 10-11 сынып оқушылары — Дамир Әлібаев, Ерасыл Мэлс, Манас Еркінұлы, Спандияр Тұяқбай, Әлихан Дәулет, Ғизат Төреғалиев, Бақдәулет Асыл, Хабиб Атиг Ур Рахман және Алдияр Ихсанов STEM-ге жергілікті қоғамдастықты тартқаны үшін Connect Award сыйлығын алды.

Жаңаөзен қаласының Rebels командасының 9-11 сынып оқушылары - Сұлтан Бимағамбет, Бексұлтан Огланбек, Әділет Байғұбен, Ізбазар Балғамбаров, Батыржан Орынбаев, Айбек Нұралы, Бек Ерлепес, Данияр Ысқақов және Мәди Жандосов роботтың ойластырылған дизайны мен функционалдығы үшін Design Award сыйлығын алды.

"Қазақстан құрамасы түрік тарапынан эксклюзивті шақыру алды. Шәкірттерімнің шетелде жеңіске жетуі нағыз ұмытылмас сезім. Енді Астанада өтетін Орталық Азия кезеңіне қарқынды дайындаламыз", - деді Rebels командасының жаттықтырушысы Жөндер Сүлейменова.

Еске салсақ, қазақстандық оқушылар Түркия чемпионатына жолдаманы өткен жылдың желтоқсанында Оқу-ағарту министрлігі мен Алматы қаласы әкімдігінің қолдауымен USTEM Foundation қоғамдық қоры ұйымдастырған Almaty Tech Cup республикалық турнирінде жеңіп алған болатын.