Оқушылар халықаралық математика олимпиадасында төрт медаль иеленді

Қазақстандық оқушылар EGMO-2024 қыздарға арналған халықаралық математикалық олимпиадада төрт медаль жеңіп алды, - деп хабарлайды "Opennews.kz" ақпарат агенттігі.

Цхалтубо қаласында (Грузия) EGMO-2024 қыздарға арналған халықаралық математикалық олимпиадасы өз мәресіне жетті. Жарысқа 54 елден 212 оқушы қатысты. Қазақстан құрама командасында төрт оқушы мен екі жетекші бар.

Олимпиада қорытындысы бойынша Қазақстан командасының қоржыны 4 медальға толықты:

• Күміс медаль - Анастасия Одинцова - Павлодар қаласындағы дарынды балаларға арналған №8 мектеп-лицейінің 11-сынып оқушысы;
• Күміс медаль - Амира Кенбаева – Алматы қаласындағы физика-математика бағытындағы Назарбаев зияткерлік мектебінің 11-сынып оқушысы;
• Қола медаль - Арай Қасенова – Алматы қаласындағы Haileybury Almaty халықаралық мектебінің 11-сынып оқушысы;
• Қола медаль - Аружан Батырхан - Алматы қаласындағы Республикалық физика-математика мектебінің 9-сынып оқушысы.