Анасының есірткіге тәуелділігінен тоғыз күндік сәби қайтыс болды

Ұлыбританияның Ньюквей қаласында тоғыз күндік қыз бала анасының емшек сүті арқылы кокаиннің көп мөлшерін қабылдағаннан кейін қонақүйде қайтыс болды. Ал сәбидің ата-анасы түрме жазасынан құтылды, - деп хабарлайды  Opennews.kz  ақпарат агенттігі.

The Sun басылымының мәліметінше, қайғылы оқиға Корнуоллдағы Hotel Victoria қонақүйінде болған. Шақырту бойынша жедел қызметтер келгенімен, дәрігерлер сағат 11:00-де баланың қайтыс болғанын ғана анықтаған. Сәбиді ес-түссіз күйде, бетіндегі қан іздерімен әжесі тауып алған. Сол кезде баланың ата-анасы бөлмеде дүрбелеңмен айғайлап жүрген.

30 жастағы Рошель Томас пен 29 жастағы Эндрю Мондер балаға немқұрайлы қарағандарын мойындады.

Сот-медициналық сараптама сәбидің қанынан кокаин анықтады. Прокурор Джосс Тайсхерст есірткі заттың қыздың ағзасына емшек сүті арқылы түсуі мүмкін екенін мәлімдеді. Сонымен қатар ата-ананың киімі мен саусақтарынан, сондай-ақ төсек жанындағы тумбада тұрған кеседен кокаин іздері табылған.

Қорғау тарапы болған жағдайды "кездейсоқ қайғылы жағдай" деп атады. Сондай-ақ ерлі-зайыптылар туыстарына көшуді жоспарлағанын және мамандардан көмек іздегенін айтты.

Судья Саймон Карр ата-ананы үш жыл сынақ мерзімімен екі жарым жылға шартты түрде бас бостандығынан айыру жазасына кесті. Ол ерлі-зайыптылар өздерінің тәуелділігін баланың қауіпсіздігінен жоғары қойғанын айтты. Қосымша шара ретінде ата-ананы оңалту курсынан өтуге міндеттеді.