Мектеп оқушыларының күзгі демалысы 27 қазанда басталады
Қазақстандық мектеп оқушылары үшін күзгі демалыс биыл 2025 жылдың 27 қазанында басталып, 2 қарашаға дейін жалғасады. Бұл туралы Оқу-ағарту министрлігінің баспасөз қызметі мәлімдеді, - деп хабарлайды "Opennews.kz" ақпарат агенттігі.
Бір аптаға созылатын күзгі каникул кезінде оқушылар тек демалып қана қоймай, тәрбиелік және дамытушы іс-шараларға да қатыса алады. Оқу-ағарту министрлігі «Адал азамат» біртұтас тәрбие бағдарламасы аясында арнайы жоспар ұсынды.
Жоспар аясындағы негізгі іс-шаралар:
«Демалыста кітап оқимыз» – «Балалар кітапханасы» жобасы шеңберінде өтеді;
«Буллингтен қорған!» – қауіпсіздікке арналған ақпараттық сабақ;
«Мектеп театры» – оқушылардың шығармашылық қабілетін дамытуға бағытталған.
Министрлік балалардың қауіпсіздігін қамтамасыз етуді басты назарда ұстауға шақырып отыр. Осыған байланысты ата-аналар мен мектептерге жол-көлік қауіпсіздігі, үйдегі өрт қауіпсіздігі, киберқауіпсіздік, сондай-ақ қоғамдық тәртіпті сақтау шараларына белсенді қатысу ұсынылды.
