МӘМС жыры: Аймағамбетов заң бәріне ортақ болуы керегін айтты
2 410
Мәжіліс депутаты Асхат Аймағамбетов МӘМС жүйесі туралы ойын айтты, деп хабарлайды "Opennews.kz" ақпарат агенттігі.
Депутат атап өткендей, МӘМС жүйесінде әрбір азамат ай сайын жалақысынан 2% жарна төлейді. Жұмыс беруші де әр қызметкері үшін қосымша 3% аударады. Бұдан бөлек, 15 санаттағы азаматтар бар: зейнеткерлер, балалар, студенттер және тағы басқалар. Олар үшін жарнаны мемлекет төлеуі тиіс. Заң бойынша — орташа жалақының 2%-ы көлемінде.
Ал іс жүзінде не болып жатыр? Азаматтар мен жұмыс берушілер жарнаны уақтылы төлейді. Төлемесе — бірден жүйеден шығарылады, медициналық көмек тоқтайды. Ал мемлекет ше? Қаржы министрлігі жарнаны орташа емес, медиандық жалақыдан есептейді. Бұл — заң бұзушылық. Орта есеппен жүйе жыл сайын 250 млрд теңге жоғалтады. 2024 жылы тіпті осы азайтылған жарнаның жартысы ғана төленген. Соның салдарынан денсаулық сақтау жүйесі 2024 жылы 500 млрд теңгеден астам қаражаттан қағылды, - деді Аймағамбетов.
Бұл жай ғана сан емес. Осы қаражаттың түспеуіне байланысты:
• емханалардағы ұзын-сонар кезектер,
• қолжетімсіз анализдер мен дәрі-дәрмек,
• және уақытында көмек ала алмаған мыңдаған адам.
Сонда қалай болады? Азамат төлемесе — жүйеден шығарылады. Ал мемлекет төлемесе — ештеңе болмайды. Ешкім жауап бермейді. Заң бәріне ортақ болуы керек, - деп айтты депутат.
