Әлеуметтік газды халықтың аузынан жырып сатуға жол бермеймін – Нәлібаев

31 қазан 2023, 10:28

2 522

Облыс әкімі Нұрлыбек Нәлібаевтың төрағалығымен өткен мәжілісте газ тапшылығы мәселесі талқыланды, деп хабарлайды "Opennews.kz" ақпарат агенттігі.

Аймақ басшысы халық қажеттілігіне арналған, төмен бағамен берілетін газды кәсіпкерлерге құнын қымбаттатып сатқан операторларды қатаң сынға алды.

"Үкімет халық үшін арзан бағамен газ береді. Ал сіздер сол газдан пайда табу үшін сыртқа сатасыздар. Жол салушы компаниялардың жанар-жағармай шығыны жобасында қаралған. Оларды газбен қамтамасыз етуге міндетті емессіздер. Біз ондай уәде берген жоқпыз! Арзандатылған газды халықтың аузынан жырып, қымбатқа сатуға жол бермеймін!" – деді әкім.

Мәжілісте газбен қамтамасыз ететін оператор мекемелердің басшылары қазіргі жағдайды баяндады.

Бүгінде облыс орталығы мен аудандарда әлеуметтік бағамен сатылатын газды тұрғындарға босату бойынша комиссия құрылып, оның ашық және әділ таратылуын қадағалайтын болады. Бұдан бөлек, облыстың Түркістан, Ақтөбе, Жезқазғанмен шекарасына арнайы бекеттер қойылып, әлеуметтік газды тасымалдау қатаң бақылауға алынбақ.

Бәсекелестікті қорғау және дамыту агенттігі төрағасының 2022 жылғы 5 шілдедегі №16 бұйрығымен Қызылорда облысының аумағындағы автогаз құю станцияларында сұйытылған мұнай газын бөлшек саудада өткізудің шекті бағалары бекітілген.

Энергетика министрлігінің жеткізу жоспары бойынша Қызылорда облысына айына орташа есеппен 6-7 мың тоннаға жуық газ бөлініп келеді. Жеткізу жоспарына сәйкес, қазан айында 6 мың 791 тонна газ бөлінді («Қазгермұнай» – 5 427 тонна, «ПКОП» – 1 364 тонна). Алайда «Қазгермұнай» компаниясының газ қондырғысындағы жоспардан тыс жұмыстарға байланысты бекітілген көлем 529 тоннаға қысқарып, жаңа жоспар бойынша 4 мың 898 тонна болды. Осыған орай Қызылорда облысына 6 мың 262 тонна газ бөлінді.

«ПКОП» компаниясынан 1 мың 364 тонна газ толық көлемде апарылды. Сонымен қатар, қазанда министрлік «СНПС Ақтөбемұнайгаз» компаниясынан 504 тонна (14 вагон) қосымша көлем бөлді. Оның 288 тоннасы (8 вагон) облысқа келді. Тағы 144 тоннасы (4 вагон) жөнелтіліп, облысқа 1 қарашада келеді деп жоспарланған, қалғаны – 72 тонна.

Болған жағдайға байланысты «Саутс Ойл» компаниясымен келіссөздер жүргізіліп, компания 104 тонна газ бөлетін болды.

Облыстан тыс жерлерге газды әкетудің алдын алу мақсатында жұмыс тобы құрылды. Бұл топ газды тиеп-жөнелту пунктінен бастап, автожанармай құю станцияларын толтыруға және одан әрі тұтынушыға сатуға дейінгі процесске бақылау жүргізіп жатыр.

Бүгінде облыста сұйытылған мұнай газы бойынша қалдық қоры – 221 тонна. Одан бөлек, 27 қазанда облысқа 224 тонна қосымша көлем бөлінді. Комиссия отырысы сол күні өткізіліп, өңірлік операторларға бөлініс жасалды.

Айта кетсек, қарашаға 7 мың 458 тонна газ қарастырылған. Оның ішінде, «Қазгермұнай» компаниясынан 4 мың 740 тонна бөлініп, бірінші онкүндікте 1 мың 840 тоннасы жоспарға сәйкес жеткізіледі.

Мәжіліс қорытындысында өңір басшысы барлық операторларға газды сатуға қатысты шектеулерді алып тастауды тапсырды.

"Бизнес – үнемі табыс табу деген сөз емес. Арзан газды сатып, газ тапшы кезде еш әрекет етпей, қол қусырып отыруға болмайды," – деп ескертті облыс әкімі.