Шиелі ауданының әкімі тұрғындарды жеке қабылдады

Бүгін Шиелі ауданының әкімі Айтбай Жандарбеков аудан тұрғындарын жеке мәселелері бойынша кезектілік тәртібімен қабылдады, - деп хабарлайды "Opennews.kz" ақпарат агенттігі.

Қабылдау барысында тұрғындар тұрғын үй, жер алу, тұрақты жұмысқа орналасу және өзге де әлеуметтік мәселелерін көтерді. Аудан басшысы әрбір азаматтың өтінішін мұқият тыңдап, заң аясында түсіндірулер беріп, шешу жолдарын қарастырды.

Жұмыс сұраған азаматтарға аудандағы мекемелер мен кәсіпкерлік нысандардағы бос жұмыс орындары ұсынылды. Қоғамдық жұмыстар мен қайта даярлау курстарына қатысу мүмкіндіктері қарастырылды.

Ал тұрғын үйге қатысты сұрақтарға – мемлекеттік бағдарламалар аясында баспанамен қамту жұмыстары кезең-кезеңімен жүзеге асырылып жатқаны айтылды.

Қабылдауға келген әрбір мәселе бойынша зерттеулер жүргізіліп, заң талаптарына сай шешім қабылданатын болады.

Айта кетейік, аудан әкімінің жеке қабылдауына жазылу үшін egov.kz порталы, e-otinish базасы немесе әкімдікке келіп, жазбаша өтініш қалдыру арқылы тіркелуге болады.