Қаз
Рус
Қызылордада құтқарушылар далада қалған жолаушыларға жедел көмек көрсеткен
2 515
Қызылорда облыстық төтенше жағдайлар департаментінің 112 қызметіне облыс аумағындағы тасжолдан алыста көлік қалып қойғаны туралы дабылды хабарлама түскен,- деп хабарлайды Оpennews.kz ақпарат агенттігі kaz.inform порталына сілтеме жасап.
Департаменттің баспасөз қызметі мәлім еткендей, темір тұлпар тасжолдан 35 шақырым қашықтықта, яғни жету қиын Телікөл аймағында тұрып қалған. Ішіндегі адамдар екі күн бойы далада қонуға мәжбүр болған. Олар өз күшімен шыға алмаған соң құтқарушылар көмегіне жүгінген.
– Іздестіру жұмысы жолдың жоқтығы мен батпақ болуы салдарынан күрделене түсті. Зардап шеккендерге жету үшін жоғары өтімді техника жұмылдырылды. Аумақты әуеден барлау үшін ұшқышсыз ұшу аппараты қолданылып, үйлестіру спутниктік байланыс арқылы жүргізілді. Таңертең іздестіру тобы төрт ер адамды тауып алды. Құтқарушылар оларды даладан эвакуациялап, облыс орталығына жеткізді. Ешкімге медициналық көмек қажет болған жоқ, – делінген хабарламада.
