Қызылорда облысында мемлекеттік қызметкерлерге ҚАЖД мекемесіне экскурсия ұйымдастырылды

30 мамыр 2024, 16:16

2 524

Қызылорда облысы ҚАЖД-ға қарасты тергеу мекемесінде мемлекеттік қызметкерлерге арналған сыбайлас жемқорлыққа қарсы экскурсия ұйымдастырылды, – деп хабарлайды "Opennews.kz" ақпарат агенттігі Polisia.kz сайтына сілтеме жасап.

Қызылорда облысы бойынша Қылмыстық-атқару жүйесі департаментіне қарасты №68 мемлекеттік мекемесінде сыбайлас жемқорлықпен күресу мақсатында мекеме аумағы мен режимдік аймаққа экскурсия ұйымдастырылды.

Бұл жиынға ҚР денсаулық сақтау министрлігі санитарлық-эпидемиологиялық бақылау комитеті Қызылорда облысының санитариялық-эпидимиологиялық бақылау департаменті РММ қызметкерлері келіп, темір торды өз көздерімен көрді.

Басты мақсат – мемлекеттік қызметкерлер арасында сыбайлас жемқорлыққа қарсы мәдениетті қалыптастыру, бас бостандығынан айыру мекемелерінде болудың ауыртпалығын сезіну, сыбайлас жемқорлық және өзге де қылмыстық құқық бұзушылық салдарымен таныстыру үшін оларды қамаудағылар әлеміне енгізу.

Бұл экскурсияның мемлекеттік қызметкерлер үшін тәрбиелік мағынасы зор. Мекеменің режим және күзет бөлімінің бастығы Асылбек Төребеков экскурсияға келушілерді тергеу мекемесінің арнайы контигенттер ұсталатын аймағындағы шаруашылық бөліміне қалдырылған сотталғандар жататын жатақхананы, камераларды аралатып, жазасын өтеушілердің режимдік аймақта ұсталу жағдайымен таныстырып шықты.

Алдымен кезекші бөлімге бастап апарып, тергеу мекемесінің негізгі қызметтік міндеті – мекеме ішінде жүріп-тұру жағдайы жайлы айтып түсіндірді.

"Біздің тергеу мекемесінің негізгі міндеті – күдіктілер мен айыпталушылар және тергеудегілер мен бес жылға дейінгі сотталғандарды ұстау және олардың режим тәртібін қадағалау, сотталған азаматтардың жаза мерзімін өтеу барысында өмірге қайта тәрбиелеу. Яғни мұнда сот үкімі заңды күшіне енгенге дейінгі айыпталушылар мен күдіктілер және шаруашылық бөліміне қалдырылған сотталғандар отырады.Толтыру лимиті – 430 адам, бүгінгі таңда қамауда 250-ге жуық контигент бар. Соның ішінде сыбайлас жемқорлық қылмысының ҚР ҚК-нің 366, 367-баптары бойынша қамауда отырғандар да бар. Олар мемлекеттік қызметте болған азаматтар. Бұл азаматтар жазалау орындарына алғаш түсіп отырғандықтан өзге қылмыскерлерден оқшауланып, бөлек камераларда ұсталады. Бірақ тәртіп пен талап бәріне бірдей қатаң", – деді РжКБ-нің бастығы әділет А.Төребеков.