Жалағаш ауданының әкімі Ардақ Ибраимовтың төрағалығымен көктемгі егіс жұмыстарының барысына арналған кеңейтілген мәжіліс өтті

13 мамыр 2026, 13:40

1 507

ЕГІС НАУҚАНЫ: СУ ҮНЕМДЕУ ТЕХНОЛОГИЯЛАРЫНА БАСЫМДЫҚ БЕРІЛУДЕ

Бүгін аудан әкімі Ардақ Ибраимовтың төрағалығымен көктемгі егіс жұмыстарының барысына арналған кеңейтілген мәжіліс өтті. Жиынға аудан әкімінің орынбасарлары, кент және ауылдық округ әкімдері, ауыл шаруашылығы құрылымдарының басшылары, салалық бөлім жетекшілері қатысты. Күн тәртібінде көктемгі дала жұмыстарының қазіргі ахуалы, егін орналастырудың орындалуы, су ресурстарын тиімді пайдалану және су үнемдеу технологияларын енгізу мәселелері жан-жақты қаралды.

Жиын барысында аудан аумағындағы ауыл шаруашылығы саласының қазіргі жағдайы мен биылғы жоспарлы көрсеткіштер кеңінен талқыланды. Биыл аудан бойынша жалпы 41 758 гектар жерге ауыл шаруашылығы дақылдарын орналастыру жоспарланған. Бұл – өңірдің аграрлық әлеуетін арттыруға бағытталған маңызды көрсеткіштердің бірі.

Атап айтқанда, күріш – 16 800 гектар, бидай – 576 гектар, мақсары – 595 гектар, арпа – 50 гектар, сұлы – 5 гектар, соя – 152 гектар, дәндік жүгері – 7 544 гектар, қант құмайы – 371 гектар, жаңа жоңышқа – 4 850 гектар, ескі жоңышқа – 8 150 гектар, картоп – 250 гектар, көкөніс – 1 115 гектар, бақша дақылдары 1 300 гектар көлемінде орналастырылмақ.

Аудан әкімдігі ауыл шаруашылығы құрылымдарымен бірлесе отырып, егіс құрылымын әртараптандыру бағытында жүйелі жұмыстар жүргізіп келеді. Бұл өз кезегінде су тапшылығы жағдайында тәуекелдерді азайтып, экономикалық тиімділікті арттыруға мүмкіндік береді.

Жиында баяндалған мәліметке сәйкес, қазіргі таңда жоспарланған мақсары, бидай, арпа, сұлы, соя, қант құмайы және жаңа жоңышқа дақылдары толықтай орналастырылған. Ал көпжылдық жоңышқа алқаптары тұрақты күтімге алынған. Бұл – егіс науқанының бірінші кезеңі ойдағыдай орындалып жатқанын көрсетеді.

Күріш дақылы аудан үшін стратегиялық маңызды бағыт болып қала береді. Бүгінде жоспарланған 16 800 гектар күріш алқабының 9 825 гектарына тұқым себілген, бұл жалпы көлемнің 60,2 пайызын құрайды. Сонымен қатар 6 965 гектар алқапқа (42,6 пайыз) суға бастыру жұмыстары жүргізілген. Қалған алқаптарда агротехникалық жұмыстар жоспарға сәйкес жалғасуда.

Аудан әкімі Ардақ Ибраимов егіс науқанын белгіленген мерзімде толық аяқтау, суару жүйелерінің тиімділігін арттыру және әрбір гектар жердің өнімділігін қамтамасыз ету қажеттігін ерекше атап өтті.

– Биылғы жылдың басты міндеттерінің бірі – егінді уақытылы әрі сапалы орналастыру. Әрбір күннің, әрбір гектардың маңызы зор. Сондықтан барлық шаруашылықтар жоспарға сай жұмыс істеуі керек. Егіс науқаны еш кідіріссіз аяқталуы тиіс, – деді аудан әкімі.

Мәжілісте су ресурстарын тиімді пайдалану мәселесі негізгі тақырыптардың бірі болды. Аудан аумағында су тапшылығының алдын алу мақсатында бірқатар нақты шаралар жүзеге асырылуда. Соның ішінде су үнемдеу технологияларын енгізу, инженерлік жүйелерді жетілдіру және жерді тиімді пайдалану бағыттарына басымдық берілуде.

Атап айтқанда, биыл 15 000 гектар жерге лазерлік тегістеу жұмыстары жүргізілген. Бұл технология суды біркелкі таратуға мүмкіндік беріп, су шығынын азайтады. Сонымен қатар, егін өнімділігін арттыруға оң әсер етеді. Тәжірибе көрсеткендей, лазерлік тегістеу әдісі әсіресе күріш дақылында су үнемдеудің тиімді жолдарының бірі болып отыр.

Жиында аудан әкімі бұл бағыттағы жұмыстарды одан әрі кеңейтуді тапсырды.

– Су ресурстары – бүгінгі күннің ең өзекті мәселелерінің бірі. Сондықтан біз су үнемдеу технологияларын кеңінен енгізуіміз қажет. Лазерлік тегістеу, тамшылатып суару, жаңбырлатып суару сияқты әдістерді ауыл шаруашылығына белсенді енгізу – уақыт талабы. Сонымен қатар суды аз қажет ететін дақылдардың үлесін арттыруымыз керек, – деді Ардақ Ибраимов.

Сондай-ақ жиында егістік алқаптарға су жеткізу жүйесін тұрақтандыру, каналдарды тазалау, су бөлу тәртібін қатаң сақтау және шаруашылықтар арасындағы су ресурстарын әділ бөлу мәселелері талқыланды. Бұл бағытта тиісті мекемелерге нақты тапсырмалар берілді.

Аудан әкімдігі тарапынан ауыл шаруашылығы құрылымдарына жанар-жағармай, тұқым және тыңайтқышпен қамтамасыз ету, техника дайындығын күшейту және агротехникалық талаптарды сақтау бойынша тұрақты бақылау жүргізілуде.

Жиын барысында сондай-ақ ауылдық округ әкімдеріне нақты міндеттер жүктелді. Атап айтқанда, әр округте егіс жұмыстарының барысын күнделікті бақылау, шаруашылықтармен тығыз байланыста болу және туындаған мәселелерді жедел шешу тапсырылды.

Аудан басшысы ауыл шаруашылығы саласындағы әрбір көрсеткіш аудан экономикасына тікелей әсер ететінін атап өтіп, жауапкершілікті күшейту қажеттігін ескертті.

– Ауыл шаруашылығы – аудан экономикасының негізгі тірегі. Сондықтан әрбір атқарылған жұмыс сапалы әрі нәтижелі болуы тиіс. Біз тек көлемге емес, сапаға да мән беруіміз қажет, – деді аудан әкімі.

Жиын қорытындысында барлық жауапты сала басшыларына, кент және ауылдық округ әкімдеріне нақты тапсырмалар беріліп, олардың орындалуы қатаң бақылауға алынатыны ескертілді.

Жалағаш ауданы әкімінің баспасөз қызметі хабарлағандай, көктемгі егіс жұмыстары тұрақты бақылауда және барлық шаралар белгіленген жоспарға сәйкес жүзеге асырылуда. Су үнемдеу технологияларын енгізу мен егін құрылымын әртараптандыру бағытындағы жұмыстар алдағы уақытта да жалғасын табады.