ҚЫЗЫЛОРДА ОБЛЫСЫ ДЕЛЕГАЦИЯСЫНЫҢ ФРАНЦИЯҒА ЖҰМЫС САПАРЫ БАСТАЛДЫ

ҚЫЗЫЛОРДА ОБЛЫСЫ ДЕЛЕГАЦИЯСЫНЫҢ ФРАНЦИЯҒА ЖҰМЫС САПАРЫ БАСТАЛДЫ

Облыс әкімі Мұрат Ергешбаев тапсырмасына сәйкес, Қазақстан Республикасының Франциядағы Елшілігінің қолдауымен Қызылорда облысының ресми делегациясы Франция Республикасының астанасы Париж қаласына жұмыс сапарын бастады. Делегацияға облыс әкімінің орынбасары Ардақ Зебешев жетекшілік етуде. Аталған іссапар өңірдің халықаралық байланыстарын кеңейтуге, инвестициялық мүмкіндіктерін таныстыруға және Францияның жетекші компанияларымен өзара тиімді әріптестікті дамытуға бағытталған.

Бүгінде Қызылорда облысында өнеркәсіп, ауыл шаруашылығы, жаңартылатын энергетика, құрылыс индустриясы, логистика және экологиялық жобалар саласында ауқымды жұмыстар жүзеге асырылуда. Осы бағыттар бойынша шетелдік инвесторларды тарту – өңір дамуының негізгі басымдықтарының бірі. Францияға ұйымдастырылған бұл жұмыс сапары аталған міндеттерді іске асыру жолындағы маңызды қадамдардың бірі болып саналады.

Сапардың алғашқы күні делегация мүшелері Францияның бірқатар жетекші компаниялары мен халықаралық бизнес өкілдерімен B2B форматында келіссөздер өткізді. Кездесулер барысында ауыл шаруашылығы, тұқым шаруашылығы, техникалық қарасора өсіру, су ресурстарын тиімді пайдалану, жаңартылатын энергия көздері, экология және инвестициялық жобаларды қаржыландыру мәселелері жан-жақты талқыланды.

Атап айтқанда, делегация өкілдері «Maisadour», «Hemp-it», «LAROCHE Group», «Irri France», «Heartland Capital», «TotalEnergies» және «SUEZ» компанияларының басшылары және сарапшыларымен кездесті. Бұл компаниялар ауыл шаруашылығы технологиялары, агроөнеркәсіп, су үнемдеу жүйелері, жасыл энергетика және экологиялық менеджмент салаларында халықаралық деңгейде үлкен тәжірибеге ие.

Кездесу барысында француз компаниялары Қызылорда облысының табиғи-экономикалық мүмкіндіктеріне, аграрлық сектордағы әлеуетіне және өңірде жүзеге асырылып жатқан инвестициялық реформаларға жоғары қызығушылық танытты. Өз кезегінде облыс делегациясы инвесторларға өңірде бизнес жүргізу үшін жасалған қолайлы жағдайлар, мемлекеттік қолдау тетіктері, арнайы индустриялық аймақтар мен инфрақұрылымдық мүмкіндіктер жөнінде кеңінен ақпарат берді.

Сапар аясында екі маңызды халықаралық үшжақты меморандумға қол қойылды. Бірінші меморандум Қызылорда облысының әкімдігі, «Maisadour» компаниясы және «Harvest Agro» компаниясы арасында жасалды. Құжат жүгері тұқымдарын өндіру және өңірде заманауи тұқым шаруашылығын дамыту бағытындағы ынтымақтастықты көздейді. Бұл бастама ауыл шаруашылығы өнімдерінің сапасын арттыруға, жоғары өнімді гибридті тұқымдарды жергілікті жерде өндіруге және агроөнеркәсіптік кешеннің бәсекеге қабілеттілігін күшейтуге мүмкіндік береді.

Екінші меморандум Қызылорда облысының әкімдігі, «Hemp-it» және «Harvest Agro» компаниялары арасында техникалық қарасора тұқымдарын өндіру және өңдеу жобасы бойынша рәсімделді. Бұл жоба өңірде жаңа аграрлық бағыттарды дамытуға, инновациялық технологияларды енгізуге және экспорттық әлеуетті арттыруға жол ашады. Сонымен қатар техникалық қарасора өндірісі экологиялық таза өнім өндіру, қайта өңдеу өнеркәсібін дамыту және ауылдық жерлерде жаңа жұмыс орындарын ашу тұрғысынан да маңызды.

Меморандумдарға қол қою рәсімінде тараптар аталған жобалардың Қызылорда облысының аграрлық секторын жаңғыртудағы маңызын ерекше атап өтті. Француз компаниялары өздерінің озық технологиялары мен тәжірибесін енгізуге дайын екендіктерін білдірсе, өңір басшылығы инвестициялық жобаларды толық қолдауға әзір екенін жеткізді.

Жұмыс сапары аясында Қызылорда облысының делегациясы Францияның беделді іскерлік ұйымдарының бірі – «MEDEF International» ұйымының басшылығымен де кездесу өткізді. Бұл ұйым Франциядағы ең ірі кәсіпорындар мен кәсіпкерлер федерацияларын біріктіретін ықпалды үкіметтік емес құрылым болып табылады. Ұйым халықаралық экономикалық байланыстарды дамытуға және француз бизнесінің шетелдік серіктестермен ынтымақтастығын нығайтуға белсенді түрде атсалысады.

«MEDEF International» алаңында өткен дөңгелек үстел барысында облыс әкімінің орынбасары Ардақ Зебешев Қызылорда облысының инвестициялық әлеуеті жөнінде кең көлемді таныстырылым жасады. Ол өңірдегі индустриялық жобалар, көлік-логистикалық мүмкіндіктер, ауыл шаруашылығы саласындағы реформалар, жаңартылатын энергия көздерін дамыту бастамалары және халықаралық серіктестікке ашықтық мәселелеріне тоқталды.

Француз бизнес қауымдастығы Қызылорда облысының инвестициялық бастамаларына ерекше қызығушылық танытып, болашақта бірлескен жобаларды жүзеге асыруға дайын екендіктерін білдірді. Тараптар алдағы уақытта нақты инвестициялық ұсыныстар әзірлеп, өзара іс-қимылды нығайту бағытында жұмыстарды жалғастыруға уағдаласты.

Сондай-ақ кездесу барысында су тапшылығы мәселесін шешу, ауыл шаруашылығында цифрлық технологияларды енгізу, экологиялық тұрақтылықты қамтамасыз ету және жаңартылатын энергетика саласындағы халықаралық тәжірибені пайдалану мәселелері де көтерілді. Бұл бағыттар Қызылорда облысы үшін стратегиялық маңызға ие және өңірдің ұзақ мерзімді әлеуметтік-экономикалық дамуына тікелей әсер етеді.

Францияға ұйымдастырылған жұмыс сапары Қызылорда облысының халықаралық экономикалық байланыстарын кеңейтуге, жаңа инвестициялар тартуға және инновациялық жобаларды жүзеге асыруға тың серпін береді деп күтілуде. Сонымен қатар бұл сапар Қазақстан мен Франция арасындағы өңіраралық ынтымақтастықты нығайтып, екі елдің бизнес құрылымдары арасындағы өзара тиімді байланыстарды дамытуға ықпал етеді.

Қазіргі таңда Қызылорда облысында шетелдік инвестицияларды тарту, экономиканы әртараптандыру және экспортқа бағытталған өндірістерді дамыту бағытында жүйелі жұмыстар жүргізілуде. Осы орайда Францияның жетекші компанияларымен орнатылған серіктестік өңірдің инвестициялық тартымдылығын арттырып қана қоймай, жаңа технологиялар мен халықаралық тәжірибені енгізуге мүмкіндік береді.

Жалпы, Францияға жасалған бұл жұмыс сапары Қызылорда облысының халықаралық аренадағы экономикалық белсенділігін арттыруға, өңірдің инвестициялық беделін нығайтуға және жаңа өндірістік бастамаларды жүзеге асыруға бағытталған маңызды дипломатиялық әрі экономикалық қадам болып табылады.