Қызылорда облысында Мемлекеттік рәміздер жөніндегі комиссия отырысы өтті
Бүгін облыс әкімінің орынбасары Мейрамбек Шермағанбеттің төрағалығымен «Облыс әкімдігі жанындағы мемлекеттік рәміздер жөніндегі комиссия» отырысы өтті. Жиында мемлекеттік рәміздердің қолданылуы, олардың заң талаптарына сәйкес орналастырылуы, насихатталу деңгейі және жүргізілген мониторинг жұмыстарының қорытындылары кеңінен талқыланды.
Комиссия отырысына облыстық басқарма басшылары, қала және аудан әкімдерінің орынбасарлары, аумақтық департаменттер мен инспекция жетекшілері, сондай-ақ жауапты сала мамандары қатысты. Басқосу барысында мемлекеттік рәміздерді пайдалану мәдениетін қалыптастыру, олардың мәртебесін арттыру және ұлттық құндылықтарды дәріптеу бағытындағы жұмыстарға ерекше назар аударылды. Күн тәртібінде мемлекеттік рәміздердің насихатталуы мен қолданылу жай-күйіне облыстық инспекциялық топпен жүргізілген тексеру қорытындылары қаралды. Сонымен қатар бірқатар аудандардағы мемлекеттік рәміздердің қолданылуы, мекемелерде орналастырылуы және насихатталу барысы бойынша атқарылған жұмыстар сараланды.
Аймақ басшысының тапсырмасына сәйкес құрылған облыстық инспекциялық топ 2026 жылдың 7-30 сәуір аралығында өңірдегі 104 мемлекеттік мекемеге зерделеу жұмыстарын жүргізді. Аталған тексерулер барысында мемлекеттік рәміздердің қолданыстағы заңнама талаптарына сәйкестігі, олардың орналастырылу тәртібі, техникалық жағдайы, сондай-ақ ресми іс-шараларда қолданылу мәдениеті назарға алынды. Зерделеу барысында мемлекеттік мекемелердегі Қазақстан Республикасының Мемлекеттік Туы, Мемлекеттік Елтаңбасы және Мемлекеттік Әнұранының қолданысы арнайы бекітілген ұлттық стандарттарға сәйкес екендігі тексерілді. Сонымен қатар рәміздердің сапасы, өлшемі, орналасу тәртібі және көрнекі безендіру талаптарының сақталуы бойынша талдау жасалды. Кейбір мекемелерде анықталған кемшіліктер мен ескертулер назарға алынып, оларды қысқа мерзім ішінде түзету жөнінде нақты тапсырмалар берілді.
Комиссия отырысында сөз сөйлеген Мейрамбек Шермағанбет мемлекеттік рәміздер – ел тәуелсіздігінің және ұлттық бірегейліктің басты нышандары екенін атап өтті. Ол мемлекеттік рәміздерге құрметпен қарау әрбір азаматтың парызы екенін айтып, бұл бағыттағы жұмыстарды жүйелі түрде күшейту қажеттігін жеткізді. Сонымен қатар мемлекеттік мекемелерде рәміздерді пайдалану барысында заң талаптарының қатаң сақталуы тиіс екенін ескертті. Комиссия қорытындысы бойынша облыстық басқарма басшыларына, Қызылорда қаласы және аудан әкімдеріне, аумақтық департаменттер мен инспекция жетекшілеріне мемлекеттік рәміздердің бекітілген ұлттық стандарттарға және Қазақстан Республикасының нормативтік-құқықтық актілеріне сәйкес қолданылуын тұрақты бақылауда ұстау тапсырылды. Сондай-ақ мемлекеттік рәміздерді орналастыру кезінде эстетикалық талаптар мен ресми рәсімдердің сақталуына ерекше мән беру қажеттігі айтылды. Жиында мемлекеттік рәміздерді насихаттау бағытындағы ақпараттық-түсіндіру жұмыстарының маңыздылығы да ерекше атап өтілді. Білім беру ұйымдарында, мәдениет мекемелерінде және мемлекеттік ұйымдарда жастар арасында патриоттық тәрбие жұмыстарын күшейту, мемлекеттік рәміздердің тарихы мен маңызын кеңінен насихаттау мәселелері көтерілді. Бұл бағыттағы жұмыстар жастардың елге деген сүйіспеншілігін арттырып, отансүйгіштік құндылықтарды қалыптастыруға ықпал ететіні айтылды. Сонымен қатар комиссия отырысында «4 маусым – Мемлекеттік рәміздер күніне» арналған іс-шараларды жоғары деңгейде ұйымдастыру мәселесі қаралды. Аталған мереке аясында өңірде түрлі патриоттық акциялар, салтанатты жиындар, мәдени-көпшілік іс-шаралар, көрмелер, дөңгелек үстелдер және жастар форумдарын өткізу жоспарланып отырғаны айтылды.
Ақпараттық-имидждік жұмыстарда бірегейлікті сақтау мақсатында барлық жауапты мекемелерге нақты тапсырмалар жүктелді. Атап айтқанда, мерекелік баннерлер мен көрнекі ақпараттарды әзірлеуде мемлекеттік рәміздердің ресми үлгілерін пайдалану, бірыңғай дизайнерлік талаптарды сақтау және заңнама талаптарына сәйкес ресімдеу міндеттелді. Сонымен қатар бұқаралық ақпарат құралдары мен әлеуметтік желілер арқылы мемлекеттік рәміздердің маңызын кеңінен насихаттау тапсырылды. Комиссия отырысында мемлекеттік рәміздерге қатысты заң бұзушылықтардың алдын алу мәселесіне де ерекше назар аударылды. Жауапты мекемелерге түсіндіру жұмыстарын күшейту, тұрақты мониторинг жүргізу және бақылау шараларын жалғастыру міндеті жүктелді. Мемлекеттік рәміздерді дұрыс пайдалану мен құрметтеу мәдениетін қалыптастыру – елдік сананы нығайтудың маңызды тетігі екені атап өтілді. Сондай-ақ мемлекеттік рәміздердің қоғамдағы беделін арттыру мақсатында мәдени-ағартушылық жобаларды көбейту, жастардың қатысуымен патриоттық іс-шараларды ұйымдастыру және әлеуметтік желілерде арнайы ақпараттық контенттер әзірлеу мәселелері ұсынылды. Бұл бағыттағы жұмыстар ұлттық құндылықтарды дәріптеуге және қоғамда патриоттық рухты нығайтуға бағытталмақ. Жиын қорытындысында барлық жауапты мекемелерге мемлекеттік рәміздерді пайдалану барысында заң талаптарын қатаң сақтау, анықталған кемшіліктерді уақытылы жою және мерекелік іс-шараларды жоғары деңгейде ұйымдастыру жөнінде нақты тапсырмалар берілді. Сонымен қатар өңірде мемлекеттік рәміздерді ұлықтау және олардың мәртебесін арттыру бағытындағы жұмыстар алдағы уақытта да тұрақты түрде жалғасатыны атап өтілді.
