Маңғыстауда екі күн ішінде 45 жезөкше ұсталды

Маңғыстау облысында "Стоп-трафик" жедел-профилактикалық іс-шарасы барысында екі күннің ішінде 45 жезөкше ұсталған. Жеңіл жүрісті қыздар есепке қойылды.

Іс-шара 24-26 наурыз аралығында өткізілген. Осы уақыт ішінде құқық қорғаушылар моншалар мен жалдамалы пәтерлерді тексерген.
 
"Жезөкшелік және жеңгетайлықпен айналысу үшін притондарды ұйымдастыру және ұстау бойынша (ҚР ҚК 309 бап) 5 факті және кәмелет жасына толмағандарды жезөкшелікпен айналысуға тарту бойынша (ҚР ҚК 134-1 бап) бір дерек анықталды", - дейді Маңғыстау облыстық полиция департаменті. 

Тәртіп сақшылары 31 адамды қоғамдық орындардағы қудалау үшін Әкімшілік құқықбұзушылық кодексінің 449 бабы бойынша жауапқа тартқан. Сондай-ақ жезөкшелік және жеңгетайлықпен айналысу үшін ғимарат берген 3 адам Әкімшілік кодекстің 450 бабы бойынша жазаланған. 

Құжаттары жоқ төрт Өзбекстан азаматшасы уақытша қабылдау орнына орналастырылған. 

Жалпы алғанда 45 жезөкше мен 2 сутенер есепке қойылған. 

"Стоп-Трафик" жедел-алдын алу іс-шарасының бірінші күні Тараздағы Исатай батыр көшесіндегі сауықтыру кешенінде жезөкшелікпен айналысу үшін притонды ұйымдастырумен және ұстаумен айналысқан 48 жастағы әйел қолға түскен.