17 жастағы регби ойыншысы матч кезінде көз жұмды

Францияның оңтүстік-батысындағы Марманд қаласында регби ойынынан кейін 17 жастағы Клеа Менье қайтыс болды, - деп хабарлайды  Opennews.kz  ақпарат агенттігі. 

Жас спортшының жүрегі тоқтап, ауруханаға жеткізілгенімен, дәрігерлер оның өмірін сақтап қала алмады.

Клеа Менье Union du Bassin Marmandais (USB) клубының жастар құрамында өнер көрсеткен. 17 қазанда оның командасы Agen Agglo Rugby клубының құрдастарымен кездескен. Ойын барысында спортшы басынан қатты соққы алған.

Осыдан кейін регбишінің жүрегі тоқтап, оған оқиға орнында медициналық көмек көрсетілген. Кейін ол ауруханаға жеткізілгенімен, сол жерде көз жұмды. Жас спортшының қайтыс болғанын клуб 21 қазанда ресми түрде хабарлады.

Францияның регби федерациясы марқұмның жақындары мен командасына көңіл айтып, оқиғаның барлық мән-жайын анықтауға уәде берді.