Қызылордада тұрғындарға берілетін су жаңа пәтерлер сапаға сай келе ме?

Сол жағалауда жаңадан бой көтерген көпқабатты үйлердің сапасы сын көтермеуде, деп хабарлайды Opennews.kz ақпарат агенттігі.
 
 
Бүгінгі таңда облыс орталығында 2170 пәтерден аса 46 көпқабатты тұрғын үйдің құрылысы жүргізілуде. Оның жалпы құны 17,5 млрд теңгеге жуық. 2020 жылы басталған Сырдария өзенінің сол жағалауында көпқабатты – 12 тұрғын үйдің құрылысын аяқтауға тиісті қаржы бөлінген.
 
Бұдан бөлек, «Нұрлы жер» мемлекеттік бағдарламасы аясында қаланың инженерлік-коммуникациялық инфрақұрылымын дамыту және жүргізуге мән беріліп, осы мақсатта ұлттық, республикалық және облыстық бюджет есебінен барлығы 3 млрд 988 млн теңге бөлінген. Аталған қаржылар Сырдария өзенінің сол жағалауындағы тұрғын үй аулаларын абаттандыруға, СПМК-70 тұрғын ауданын жылу, кәріз, электр, телефон желілерімен қамтамасыз етуге, Сабалақ саяжайын ауызсумен қамтуға, қаланың бірқатар аумағын ауызсу және кәріз су желілері, электр, газ, жылу жүйелерін жүргізуге қаралған.
 
 

«Жалпы алғанда, биыл тұрғындарға 1370 пәтер табыстау көзделген.. Оның ішінде 430-і көпбалалы отбасыларға берілсе, 50-і апатты тұрғын үйлерде тұрып жатқан азаматтарға беріледі. Сондай-ақ 250-ін кезекте тұрған отбасылар алса, 640 пәтер «Отбасы банк» арқылы табысталады. Айта кетерлігі, кезектегі аз қамтылған көпбалалы отбасыларға 192 пәтер сатып алуға 2 млрд 456 млн теңге бөлінген. Қазірге дейін 33 пәтер сатып алынса, қалғанына мемлекеттік сатып алу конкурсы жүргізілуде», - деген болатын Қызылорда қалалық құрылыс бөлімінің басшысы Біржан Далабаев.

 
Жыл аяқталуға жақын. Осыған орай, жыл соңында Сырдария өзенінің сол жағалауындағы жаңа пәтерлер апатты жағдайда тұрған тұрғын үй иелеріне берілмек. Қыруар қаржыға салынып, құрылысы жүргізілген су жаңа пәтерлер сапаға сай ма?
 
Бұл туралы тұрғындар әлеуметтік желіде құрылысы аяқталған пәтерлерге шолу жасап видеосын жүктеген.



Бейнежазбада берілетін жаңа пәтердің сапасыздығын байқауға болады. Видео авторы бөлмеаралық қисық салынған есіктерінің аражігі ашылып, кілттері бұралмай, қабырғалары жарылып, сонымен қатар электр тоқтарының ашық күйінде орналасқандығын атап өткен.
 

Бұл сол жағалаудағы салынып жатқан жаңа пәтерлер. Бұларды дұрыстамайды деген сенімдемін. Сондықтан, иелері алатын кезде мән берсін, - деді бейнежазба авторы.

Жариялымға қатысты Қызылорда қаласынын құрылыс бөлімі КММ-нің мамандарының айтуынша,
 

Қызылорда қаласы, Сырдария өзенінің сол жағалауы 4 кварталындағы 40 пәтерлі 16 үйдің құрылыс-
монтаж жұмыстарын жеке инвестордың оз қаражатына салғандығын хабарлай келе, Қызылорда қаласының құрылыс бөлімі КММ-нің мамандарынын арнайы тексеру жұмыстарын жүргізу барысында видеода көрсетілгендей ақаулар аныкталды. Қазіргі уакытта анықталған ақауларды қалпына келтіруге арнайы ескертпе хат жолдап, тиісті жұмыстар жүргізілетіндігін хабарлайды, - делінген.

Тұрмыстық жағдайы төмен отбасылар үшін “тегін” берілетін үйдің сапасы стандартқа сай келсе игі. Десекте, сол жағалаудан үй алған пәтер тұрғындары үйдің сапасыздығын айтып әлеуметтік желілерге жариялағаны да белгілі еді.