Елімізде қанша ауыл құдықтан су ішіп отыр?

Ақтөбе облысының 60 ауылы әлі күнге дейін құдықтан су ішіп отыр, -- деп хабарлайды Opennews.kz ақпарат агенттігі.

"60 ауылда әлі орталық сумен жабдықтау жоқ. Олар Әйтеке би, Байғанин, Қобда аудандарында орналасқан. Кейбіреулерінде тек 40-50 тұрғын бар, бірақ 400-500 адам тұратын ауылдар да бар. Сегіз ауыл бойынша жобалар әзірленді, сараптаманың оң қорытындысы бар, 15 ауылда ҚБМ белгіленеді", - деді облыстық Энергетика және ТКШ басқармасы басшысының орынбасары Нұртай Сертаев.

Оның айтуынша, Алға ауданындағы Тоқмансай ауылында, Байғанин ауданындағы Қораши, Көкбұлақ, Қосарал ауылдарында, Мұғалжар ауданында Шеңгелді, Қожасай ауылдарында орталықтандырылған сумен жабдықтау бар. 24 ауылда кешенді-блокты модульдер орнатылған.

Agrogram басылымының жазуынша, 2025 жылға дейін 60 ауылдың 21-і ауыз суға қол жеткізеді. 13-інде құрылыс-монтаж жұмыстары жүріп жатыр, әзірге тұрғындар құдықтар мен ұңғымалардан су ішіп отыр.

“Ақтөбе облысындағы 323 елді мекеннің 263 немесе 81%-ы ауыз сумен қамтамасыз етілген, онда 876 мың адам, яғни халықтың 98%-ы тұрады”, – делінген басылым материалында.