Қызылорда-Жезқазған автожолының жөндеу жұмыстары басталды

Республикалық маңызы бар «Қызылорда-Жезқазған» тас жолының жөндеу жұмыстары басталды, деп хабарлайды Opennews.kz ақпарат агенттігі.



Күре жол бойындағы жөндеу жұмыстары 6 лотқа бөлініп, оның төртеуінің мердігері анықталған. Бүгінде жолдың 216  шақырымына реконструкциялау жұмыстары қолға алынды.

Қызылорда облыстық Жолаушылар көлігі және автомобиль жолдары басқармасының мәлімдеуінше, ел Президентінің пәрменімен жүзеге асырылып жатқан құрылыс жұмысы облыс әкімінің тікелей бақылауында тұр. Күре жолды қайта жаңғырту негіздемесіне сәйкес, ені 7 метр болатын III техникалық санаттағы жол ені 9 метрлі II техникалық санатқа ауыстыру қаралған. Сондай-ақ  жол бойында 2 жолайрығы, үй жануарларына арналған жол өткелдері, су арнасы өтетін 3 көпір, заманауи 5 дәретхана мен 6 демалыс алаңы салынады.

Көп жылдан бері күрделі жөндеу көрмеген «Қызылорда-Жезқазған» автожолының құрылысын жүргізуші мердігерлер анықталды. Олар  – 3 қытайлық компания мен жергілікті «Қыран» жауапкершілігі шектеулі серіктестігі. Бүгінде 40 шақырым айналма жолы салынды. Жақын арада барлық айналма жолдарын ұзартып, толықтай құрылыс жұмыстарына кірісеміз, – деді «ҚазАвтожол» ҰҚ» АҚ Қызылорда облыстық филиалы директорының орынбасары Ерсайын Мұзафар.

Ал, Сыр өңірі мен Ұлытау арасын жалғайтын ауқымды жолдың жобасы 2025 жылға дейін аяқталады деп күтілуде.