Қызылорда облысында бірнеше тағайындаулар орын алды
Сыр өңірінде облыс әкімінің өкімімен бірнеше кадрлық тағайындаулар болды, - деп хабарлайды "Opennews.kz" ақпарат агенттігі.
Облыс әкімінің өкімімен Қазақстан Республикасы Президенті Әкімшілігі және Сырдария аудандық мәслихатының келісімдері бойынша Сырдария ауданының әкімі лауазымына Сәрменбаев Берік Әбдіғаппарұлы тағайындалды.
«Берік Әбдіғаппарұлы аудан жұртына етене таныс. Ауданның әлеуметтік-экономикалық, қоғамдық-саяси ахуалын жетік білетін, мемлекеттік қызметтің барлық сатысынан өткен, әлеуеті жоғары кадр. Түрлі салаларда жинаған мол тәжірибесі мен басшылық қызметтегі ұйымдастырушылық қабілетінің арқасында өзін ел дамуы жолында аянбай еңбек ететін мықты маман ретінде көрсете білді. Мемлекет басшысының бастамаларынан туындайтын тапсырмалар мен алға қойған міндеттерді жоғарғы деңгейде жүзеге асырып, Өздеріңізбен бірге нәтижелі жұмыс жасайтынына сенемін», – деді облыс әкімі.
Актив отырысында аудандық ардагерлер кеңесінің төрағасы Мұса Келдібаев, Мәдениет саласының үздігі Алмагүл Бақтиярова мен облыстық Қоғамдық кеңес төрағасы Әріп Хожбанов жаңадан тағайындалған аудан әкімін құттықтап, Ұлы Отан соғысының ардагері Яхия Тасыров бата берді.
Берік Әбдіғаппарұлы 1963 жылы Қызылорда қаласында дүниеге келген. Алматы архитектура-құрылыс институтын «Өнеркәсіптік және азаматтық құрылыс» мамандығы бойынша бітірген. Еңбек жолын 1985 жылы «Казторгстрой» тресінің тасқалаушысы болып бастаған. Әр жылдары мемлекеттік және жеке секторда қарапайым маманнан басшылық лауазымға дейінгі қызметтерде болған. 2005-2010 жылдары Қызылорда қалалық сәулет және құрылыс бөлімінің бас маманы, бөлім бастығы және Қызылорда қаласы әкімінің орынбасары. 2010-2011 жылдары «Нұр Отан» партиясы Қызылорда облыстық филиалының қоғамдық қабылдау бөлімінің меңгерушісі. 2011-2019 жылдары Қызылорда қаласы мен Қармақшы, Шиелі ауданы әкімінің орынбасары, тұрғын үй-коммуналдық шаруашылығы, жер қатынастары салаларында жауапты басшылық қызметтерді абыроймен атқарған. 2021-2022 жылдары Қызылорда облысының энергетика және тұрғын үй-коммуналдық шаруашылық басқармасы басшысының орынбасары қызметінде нәтижелі жұмыс көрсетті. 2022 жылдың мамыр айынан бастап осы кезге дейін Сырдария ауданы әкімінің орынбасары қызметін абыроймен атқарып келді.
Ал, Қызылорда облыстық білім басқармасы басшысының 2023 жылғы 12 сәуір №33-ЖҚ бұйрығымен «Шиелі ауданы бойынша білім бөлімі» коммуналдық мемлекеттік мекемесінің басшысы лауазымына Жібек Орынбайқызы Баймұратова тағайындалды.
Жібек Орынбайқызы 1971 жылы 18 қаңтарда Шиелі ауданында дүниеге келген. 1993 жылы Қорқыт Ата атындағы Қызылорда Мемлекеттік Университетін қазақ тілі мен әдебиеті пәні мұғалімі мамандығы бойынша бітірген.
Еңбек жолын 1993-2008 жылдары аудандық білім бөлімінде әдіскер, әдістемелік кабинет меңгерушісі болып бастаған. 2008 - 2013 жылдары аудан орталығындағы №45 "Ақорда" мектеп-гимназиясының, №47 М.В.Ломоносов атындағы мектеп-лицейдің директоры, 2013 - 2018 жылдары аудандық білім бөлімі басшысының орынбасары, бөлім басшысының міндетін атқарушы қызметін атқарған.
2018 жылдың мамыр айынан бастап осы кезге дейін Шиелі аудандық ішкі саясат бөлімінің басшысы қызметтерін абыроймен атқарды.
