Қызылордада пара алған бөлім басшысына 15 млн теңге айыппұл салынды

Қызылорда қаласының №2 сот үкімімен Қызылорда облысының Жолаушылар көлігі және автомобиль жолдары басқармасының бөлім басшысы пара алғаны үшін кінәлі деп танылды, - деп хабарлайды "Opennews.kz" ақпарат агенттігі.

Оған мемлекеттік лауазымдарды қызмет атқару құқығынан өмір бойына айыра отырып, 15 000 000 теңге сомасына айыппұл түрінде жаза тағайындалды.

Сотталушы мемлекеттік қызметкер мемлекеттік сатып алу конкурсының келісім шартына сәйкес «Қызылорда облысының автомобиль жолдарын ағымдағы жөндеу және күтіп ұстау» нысаны бойынша 2021-2022 жылдар кезеңінде орындалған жұмыстардың актілеріне қол қойғаны үшін мердігер ұйым директорынан 500 000 теңге пара алған.

Сот үкімі заңды күшіне енген.