Қарттар үйіндегі қария тірідей жанып кетті

12 қазан 2023, 09:37

1 252

Қонаев қаласындағы №10, "Шарапат" арнаулы әлеуметтік қызмет көрсету орталығында тағы да қария қаза болды, - деп хабарлайды "Opennews.kz" ақпарат агенттігі.

Қонаев қаласындағы қарттар үйінде тағы да қызмет алушы қарияның өлімі тіркелді. Естеріңізде болса, осы жылдың басында дәл осы мекемеде 76 жастағы қария асылып қалған болатын.

Бұл жолы 71 жастағы қария жатқан бөлмеден өрт шыққан. Оттың нақты неден шыққаны белгісіз. Ақсақал отқа оранған сәтте қасында не медбике, не күтуші болмаған. Тіпті мекемедегі өрт қауіпсіздігі құрылғылары да іске қосылмапты. Арнаулы әлеуметтік қызмет көрсету орталығының мамандары қарт кісі бөлмесінде темекі тартқан болуы мүмкін дейді. Пікірлерінше, бұл өрттің тұтануына себеп болды. Оның денесінің 75%-ын күйік шалып, көз жұмды.

Қонаев қаласындағы арнаулы әлеуметтік орталық қызметкерлері сол күні екі кезекті күтуші қарттардың жөргектерін ауыстырып, медбикелер денсаулық жағдайларын тексеріп жүргенін айтады. Өрттің белгілері де болмапты. Ал кезекші бөлменің есігін ашқанда, ақсақалдың өртеніп жатқанын көрген.

“Күтуші қыз бетіне су шашқан. Артынан екі медбике келген. Енді ол кісілер алғашқы көмек көрсетіпті. Бірден жедел жәрдем қызметін шақырған. Олар 6-7 минуттың ішінде келді”, – деді шаруабике Роза Жамансарина.

Шаруабикелердің айтуынша, марқұм қария темекі тартқан. Ал шылымның шоғы үстіндегі киімге құлап, өртенген екен. Киімде шоқ іздері жатыр. Медбикелер кіріп, қарияның үстіне су төгіп жалынды өшірген. Бірақ өрт сөндіретін құрылғылар істемей қалған.

“Мұндай болуы мүмкін, білмейміз ғой. Жазым оқиға. Ешкім мұндай боларын білген жоқ. Білсе, әрине, қасында отыратын едік. Біз жалғыз бұл кісіге де қарап отыра алмаймыз”, – деді аға мейірбике Жанар Байсабаева.

Дәрігерлер қария ауруханаға ауыр хәлде жеткізілгенін айтады. Ол бірден жансақтау бөліміне жатқызылған. Алайда жарақаты тым ауыр болғандықтан, көз жұмыпты.

“Басы, мойыны күйген, тіпті көзін күйік шалған. Кеудесі, іші, білегіне дейін екі қолы мен тобығындағы жараның тереңдігі 2-3 АБ”, – деді травматолог Шерзод Нуруллаев.

Қазір қарияның неден мерт болғанын анықтау үшін сот-сараптама жұмыстары жүргізіліп жатыр. Төтенше жағдайлар департаменті мекемеде қауіпсіздік талаптары бұзылғанын растады.