Қарттар үйіндегі екі зейнеткер шаңырақ көтерді

8 ақпан 2024, 10:01

1 552

№10 арнаулы әлеуметтік қызметтер көрсету орталығында қызмет алушы екі қарттың көңілі жарасып, бас құрады. Қос ардагердің қуанышына орай демеушілер өз қаржысына той жасап берген, - деп хабарлайды "Opennews.kz" ақпарат агенттігі.

Қалалық жұмыспен қамту және әлеуметтік қорғау басқармасының мәліметінше, 72 жастағы Рақымқұл Бегалыұлы мен 62 жастағы Найла Мұхаммедқызы осы қарттар үйінде танысып, бас қосқан. Екеуі де №10 әлеуметтік қызметтер көрсету орталығына 2023 жылдың маусым айында келген. Жыл соңына қарай қос ардагер үйленуге шешім қабылдап, 23 қазанда заңды некеге тұрған. Бүгін қоғам белсендісі Самат Бекебаев демеушілердің есебінен дүбірлетіп тойын ұйымдастырып берді.

Тойға қарттар үйінің қызметкерлері, жұбайлардың замандас-құрдастары қатысты. Жұмыспен қамту және әлеуметтік қорғау басқармасының басшысы Жанат Өтебаева қуаныш иелерін үйлену тойымен құттықтап, деніне саулық тіледі.

«Бақытты болуға ниет еткен адамға уақыт кедергі емес екенін өздеріңіз тағы бір рет дәлелдедіңіздер. Көңілі жарасқан адам қандай кезде де бір-біріне сүйеу. Сіздерді бүгінгі шаттық күнімен құттықтай отырып, осы тойға атсалысқан барша жанға алғыс айтамын», – деді басқарма басшысы.

Тойды ұйымдастыруда басы-қасында жүрген белсенді құттықтау сөзінде Шымкент қаласында мүгедектігі бар жандарға, жетім балалар мен өмірлік қиын жағдайға түскен әйелдерге және қарттарға жақсы жағдай жасалғанын тілге тиек етті.

«Қайырымдылық істерге араласқалы бері қаншама өңірде болдым. Алайда Шымкент қаласындағыдай әлеуметтік орталықтар, қарттарға жасалған жағдай мен мүгедек балаларға көрсетіліп жатқан көмекті ешбір өңірде көрмедім. Біз де осындай игілікті істерді ұйымдастыруда қол қусырып қалмайық деген ниетімізді амалға асырып жатырмыз», – деді қоғам белсендісі.