Шығыс Қазақстан тұрғындары бұрынғы уақытты қайтаруды сұрап, петиция жариялады

8 сәуір 2024, 17:45

1 594

Еліміздің шығысында тұратын қазақстандықтар уақытты өзгертуден бас тартуды талап етіп петиция құрды, - деп хабарлайды "Opennews.kz" ақпарат агенттігі.

Олардың пікірінше, бұрынғы уақытқа қайту халықтың әл-ауқатын жақсартып, қатерлі ісік, рахит, иммунитет тапшылығы және психологиялық бұзылулардың алдын алады.

"Уақыттың ауысуы нәтижесінде туындауы мүмкін мәселелерді шешуге назар аударып, аймақтағы жағдайды жақсартатын ымыралы шешім табу керек. Өйткені бұрын 1 сағатқа ерте қараңғы болса, қазір 2 сағат. Келешекте бұл мәселелерді шешу өңірдің дамуына және оның тұрғындарының өмір сүру сапасын жақсартуға қолайлы жағдай туғызады", - делінген петиция мәтінінде.

Айта кетейік, бұған дейін 1 наурыз күні Қазақстан бірыңғай уақыт белдеуіне ауысқан болатын.

Уақыт белдеуін ауыстыру туралы ұсынысты “Аманат" партиясы фракциясының мүшесі Еркін Әбіл айтқан еді. 29 ақпаннан 1 наурызға қараған түні Қазақстан аумағында бірыңғай уақыт белдеуін енгізу ұсынылған болатын. 19 қаңтарда бірыңғай уақыт белдеуіне ауысу туралы қаулыны Қазақстан үкіметі қабылдады.

Мамандар мұның денсаулыққа пайдасын айтты.