Енді әскери билеттер цифрлық форматқа ауыстырылды
Енді жұмысқа орналасу немесе оқу орнына қабылдау кезінде әскери билетті түпнұсқада ұсыну туралы талап алынып тасталды, - деп хабарлайды "Opennews.kz" ақпарат агенттігі.
Жұмыс беруші азаматтың әскери билетін egov.kz электрондық үкімет ресурсын пайдалана отырып, автоматты түрде алады.
Заңнама бойынша заңды тұлғалар азаматтардың әскери қызметі туралы деректерді тіркеуге міндетті. Сондықтан кадр қызметтері бұрын әскери билеттер, тіркеу туралы куәлік, әскери қызмет өткергенін растау туралы анықтама және т.б. талап еткен.
Қорғаныс министрлігі еңбек және халықты әлеуметтік қорғау, цифрлық даму, инновациялар және аэроғарыш өнеркәсібі министрліктерімен, мемлекеттік қызмет істері агенттігімен бірлесіп, жұмыс берушінің сұрауына автоматты түрде жауап алуға мүмкіндік беретін интеграциялық жұмыстар жүргізді.
Жеке ұйымдар "Е-Еңбек" ақпараттық жүйесінде, мемлекеттік мекемелерде "Е-Қызмет" ресурсын пайдалана отырып, қызметкерлердің есебін жүргізеді.